اخو البنات -الفصل الثاني - الحلقة 16

الجزء 24
بقات ماما معايا فالسبيطار .. ومقلت لحتى واحد باللي ولدت.. كيجي ياسين يطل عليا ويتهلا فيا وماما عجبها الحال.. 
- هادو هما الرجال والا فلا،.. طبيب وبوكوس.. وولد الناس.. تشرفي بين قدام الناس.. ماشي داك مول الثواب اللي كنتي جايبالي... واخا لاباس عليه ولكن متخلف.. وها الدليل.. شوفي واش جا يشوف بنتو.. 
- ماما باراكة عليك.. انا راه مقلتلوش باللي ولدت .. ومبغيتوش يعرف.. وسدي عليا هاد الموضوع حيت ياسين مغيتزوجش وحدة مطلقة..
- هادا تفكير ديال المتخلفين اللي بحال وليد... اما دكتور ياسين عقلو متفتح ومغيهموش داكشي...
عصباتني ماما بهاد الهضرة محملتش تهضر على وليد بهاد الطريقة.. اه مازال كندافع عليه حيت مازال كنتعدب من جيهته.. 
وليت لاباس وشديت ولدي بين يديا.. شوية لقيت سليمة.. 
- هدى.. على سلامتك احبيبة.. عاد عرفتك ولدتي.. 
- باش عرفتيها.. 
- شي حد قالها لكرم.. وقالها لفاطمة الزهرا وهي اتصلات بيا وقالتهالي.. 
- نتي ماقلتي والو لوليد ياك.. 
- لا مقلتش .. ومغانقولش الا مبغيتيش نتي.. 
- كنحماق عليك حيت كتفهميني.. 
- خليني نشوف حبيب عمته.. ويتك كيحمق.. شحال زوين... انا مفقوصة ياختي.. ديك خيتي اللي جاب خويا مخرجاها منا.. كتوقف لماما فوجها وحاسبة راسها مولات الدار.. وانا وابتسام كتدخل لينا فحوايجنا .. كتدخل صحة فخصوصياتنا.. حتى كنلقاوها فبيوتنا.. ومقابلة غا تعمر لخويا ودنيه .. هادي رجعت للدار الساعة الفلانية وهادي رجعت للدار مع قدا.. ماماك دارت وماماك فعلات.. وقيالة كتبخر فالدار.. جاهلة ومكتخافش الله.. فرق كبير بينها وبينك...
- اللي فلت مات اسليمة.. هادشي اللي كتاب..
بقات معايا سليمة.. حسيت راسي مزيانة بزاف.. واخا ماما مكانتش حاملاها حيت من ريحة وليد .. ولكن انا عجبني الحال بزاف.. حيت جات عندي.. الغد ليه خرجت من السبيطار ومشيت للدار.. وجدت للسبوع.. جات ابتسام حتى هي .. سميت ولدي عمران.. الواليد ديالي هو اللي سماه بعدما ودن ليه فودنيه.. حضرو معايا البنات.. كان عندي مشكل فتسجيل الولد حيت ضروري باه يكون.. هاهو واحد القانون اخور اللي كيحط عنق المرأة فيد الرجل.. كاين اللي راجلها غير مسؤول كاين اللي تخلا عليها.. اووف انا مضطرة نمشي عندو.. 
مشيت ورجليا مترددة.. دخلت للمحل وهو كان ملهي مع واحد الزبون ..شاف فيا واقفة وهو يتبدل اللون.. سبع شهور هادي مشفنا بعضنا.. اكيد يكون نساني دابا.. حسيت واحد الالم طلع معايا من الاعماق.. جا عندي .. 
- هدى.. لاباس عليك.. 
حسيت راسي تزيرت بزاف سكتت شوية وانا نستجمع القوة ديالي وهضرت.. 
- اه لاباس.. بغيت نهضر معاك فموضوع.. 
- اه جلسي .. ويلا بغيتي نمشيو نجلسو فبلاصة اخرى من غير هادي انا معندي حتى مانع.. 
- لا مغنطولش عليك.
- هدى.. واش وقعات شي حاجة للبيبي..
- انا ولدت ولد.. 
- على سبع شهور؟؟
- تبارك الله عليك راك حاسب.. 
- باليوم والدقيقة.. ولكن علاش مقلتليش نجي عندك .. كنت كنتمنى نكون اول واحد كيهز ولدي بين يدي..
- كنتي مشغول.. كنتي كتدوش.. 
- كندوش؟؟ مفهمتش .. شنو كتقصدي.. 
- كنقصد مراتك اللي جاوباتني نهار كنت كنولد... وقالتلي وليد راه مشغول كيدوشش.. بديت نعوج ففمي.. حسيتو تزير وتعصب .. وصوت انفاسه ارتفع.. 
- ماعلينا انا مكيهمنيش شنو كنتي كدير.. اللي كيهمني اني باغا نسجل ولدي باش نقدر نديرلو التلقيحات.. وبالمناسبة.. انا سميتو عمران.. 
نضت وجيت خارجة وقلتله.. انا نستنى اتصال منك نهار تحتاج الوثائق للتسجيل.. خليتلك الراحة.. ومشيت