اخو البنات -الفصل الثاني - الحلقة 15

22
مللي كملت كلشي تأثر بالهضرة ديالي.. كلشي بدا كيصفق ليا.. داز العرض زوين بزاف.. مشيت للدار وقررت نرتاح ونبدا نشاطي فالجمعية.. نعاونو الناس اللي تعرضو للعنف.. كما كان سواء لفظي جسدي معنوي.. مخاصناش نسكتو باش ميتماداوش فهادشي.. باراكة من هاد الطغيان.. الغد ليه مشيت للخدمة وكان الاستقبال مختلف على ديما.. كلشي كيقولي حنا معاك وغنساندوك.. كلنا ضد العنف.. وراواي الجرائد اللي كلها كتبات على الموضوع.. اللي لقا صدى كبير وتجاوب على الصعيد الوطني.. وكاين جمعيات اللي اتاصلات بالمستشفى كتطلب رقمي باش ننضم لجمعيتهم... عجبني الحال .. حيت قدرت ندير شي حاجة.. ونسمع صوتي للجميع.. ونكسر داك الطابو اللي كان مسكوت عنه.. شحال من وحدة تطلقات وشحات من وحدة تلاحت فالزنقة بسبب هادشي.. حتى لو محاولة خاص ياخد العقاب.. 
دوزت نهاري زوين مللي كملت مشيت للجمعية اللي حتى سليمة ولات عضو فيها.. وكتستمع مع اللجنة ديال الاغتصاب الجماعي واغتصاب الطفولة.. وعندها حماس كبير تقدم مساعدة لهاد الناس.. حتى الذكور كيتعرضو للاغتصاب ماشي غا الاناث.. اللي مريض يمشي يتعالج ماشي نسكتو عليه ونخبيو الموضوع.. كنت شاهدة على واحد الحالة ديال واحد المرا اللي جات كتشكي اعتداء ولد الجيران على ولادها الصغار ... الجمعية تكلفات بالتنسيق مع الامن باحضار داك الشاب اللي اتضح انه كيعاني من عقدة نفسية قديمة بحيث انه تعرض فصغره لاغتصاب جماعي .. وعائيلته سكتو على الموضوع والنتيجة انه ولا كيدير نفس الشيء .. الجمعية تكفلات بالعلاج النفسي لهاد الشاب.. والمواكبة.. الحمد لله اننا عتقنا سليمة قبل مكانت توصل لشي حاجة اكتر.. 
حياتي ولات بين الخدمة والجمعية اللي ولات كدير انشطة توعوية حتى فالقرى.. كرشي بدات تكبر وولدي كيكبر وكنحس بيه.. عمري ماشفت وليد من نهار شفتو عريس.. الموضوع ماشي ساهل.. ان الشخص اللي كان كيقولك نموت بلا بيك عايش بلا بيك بسهولة وماماتش كما كان كيقول.. ابتسام اخيرا غادي تحقق حلمها وغادي تدير عرض لازياءها.. طلبت مني نمشي معاها لطنجة.. ولكن مقدرتش كرشي ثقيلة عليا وخاصني نتهلا شوية فصحتي وفولدي اللي فورصيت عليه مؤخرا راني فشهري السادس.. معرفتش كفاش قنعات دارهم تمشي .. وعمري سولتها على وليد.. ومعرفتش فين وصل مع مرتو.. يمكن تكون دابا حاملة.. الشيء الوحيد اللي كيوصلني منو كل شهر هو الفلوس وعمري قستهم..اما فرح فتخطبت للاستاذ.. معمري شفتو ولا عرفتو شكون .. مدخلتش راسي فالموضوع كلها ينصح راسو..

الجزء 23
ابتسام نجحات وارتفع اسمها .. والعرض ديالها لقا ترحيب وكلشي اعتارف بموهبتها.. كل واحد منا كيستنى فرصة فحياته باش يثبت نفسه فحاجة معينة ومللي تجي ديك الفرصة خاص الانسان يشد فيها بيدو وسنانه.. واحد النهار اتصلت بيا وقالت لي باللي جا عندها واحد تركي وبقا كيقلب عليها ختى وصل لعنوانها.. وقطع كاع هاد المسافة باش يقنعها تخدم لصالح شركته.. وباللي عندو مجموعة شركات عالمية.. قلتلها توافق اكيد .. حيت هادي فرصة.. وداكشي اللي دارت.. وشرطات عليه متمشي لحتى بلاصا وتبقى خدامة هنا فالمدينة.. واليديا ديما كيتاصلو بيا باش يطمئنو عليا.. كنقوليهم راني مزيانة بزاف.. فرح تزوجات.. وعرضات عليا لعرسها ولكن انا اكيد منقدرش نمشي.. حيت بغيت ننسى اي حاجة كتربطني بوليد ومبغيتش نتلقاه.. شريتليها كولي ديال الدهب وصيفطولها... هادا جهدي عليها.. بقيت كنتلاقا ابتسام وسليمة.. ومرة مرة كيتاصلو بيا لبنى وفاطمة الزهراء.. اما خديجة ومريم فانا قطعت علاقتي بيهم.. وقت الشدة كيبان معدن كل واحد.. وصلت للشهر السابع.. وليت كل نهار كنحس بالحريق فكرشي.. كنقول هادا اكيد غا الضغط اللي كندير على راسي وخاصني نرتاح.. واحد التهار كنت ناعسة بالليل.. حتى حسيت بواحد الحريق فضيع.. نضت وانا كنتألم .. حتى حسيت شي حاجة كتمزق من تحتي.. يالله لا.. ميمكنش نولد دابا.. يا الله كن معايا.. حسيت بالسائل كينزل ليا مع رجلي.. نضت بسرعة ولكن مقدرتش .. خديت التلفون اول شخص جا فبالي نصونيله دابا هو وليد.. بقا كيصوني التليفون ديالو... ومكيجاوبش.. شوية سمعت صوت مرا جاوبات .. الو شكون معايا..
انا: دوزيلي وليد.. 
وهي تقول بنبرة فيها ميوعة.. وليد كيدوش.. 
قطعت الاتصال ولحت التلفون وانا نغوت غوتة وحدة.. بالحريق وبالفقصة.. حسيت الحرارة طلعات معايا.. يا الله .. عاوني يا الله.. خديت التلفون واتصلت بالدكتور ياسين .. مكنتش كنستناه يجاوبني حيت قطعت علاقتي بيه من زمان .. لحسن الحظ جاوبني .. 
- ياسين .. عاقتي عفاك انا كنولد.. 
- هدى فين راكي .. قوليلي العنوان انا جاي فورا.. 
عطيتو العنوان .. بقيت كنتقطع .. كنحس بالوقت كيتمشى بشوية كنشوف الموت قدام عيني.. حتى شي وضعية مرتاحيت فيها .. الم فالظعر وفالركابي.. والكرش .. كنحس راشي غنموت.. جا ياسين بدا كيدق .. مقدرتش نوض.. هرس الباب.. لقيتو جايب معاه واحد القابلة... وجد كلشي .. والقابلة حاولات تولدني.. انا شادة فياسين وكنغوت باقصى جهد عندي والعرق كيقطر مني.. حسيت باحشائي كتتقطع.. الم معندوش مثيل فالدنيا.. فواحد اللحظة سالات الولادة.. وحملات القابلة ولدي بين يديها وهو كيبكي.. وعطاتولي هزيتو.. عنقتو وبستو وانا القوة مبقاتش كاع فيا .. حسيت راسي باغا غي ننعس.. ياسين عاوني ودارلي السيرو .. وخدات القابلة ولدي باش تغسلو وتلبسو.. وتردولي..
-ياسين.. شكرا بزاف.. معرفتش كغاندير نرد ليه هاد الخير مع اني منستاهلوش منك.. 
- متقوليش هاكا.. نتي راه هدى.. وهدى راه بالنسبة لي حاجة كبيرة.. خاصنا نمشيو للسبيطار.. تما غاتكوني فأمان.. وغيتهلاو فيك.. 
- واخا.. 
اتصل ياسين بالاسعاف.. وجات هزوني داوني للسبيطار.. من الالطاف اللالاهية ان ياسين جا عتقني اما انا مكنتش عارفة كيفاش غانكون.. ولدي داروه فالحضانة باش يكمل النمو ديالو تما.. وانا بقيت فالمستشفى واتصلت بعد داكشي بالام ديالي باش تجي تشوفني .. وفعلا داكشي اللي درت .. جات ماما وبابا.. اطمئنو عليا.. وعاودتليهم ما جرى .. وتعصبو حيت مسمعتش كلامهم باني نمشي عندهم.. واني متبقاش بوحدي.. هاد الهضرة مكتهم فوالو.. خصوصا دابا الحمد لله ربي درزها على خير ولكن بقيت كنفكر.. فوليد اللي حتى التلفون ديالو مبقا كيتحكم فيه.. انا عمرو مخلاني نقيسلو تلفونو .. وهادي مخليها تجاوب كاع.. يوم عن يوم كنتأكد باللي كنت غالطة بزاف حيت تزوجت بوليد...