الجزء 15
- شكرا بزاف امروان .. وبالنسبة للتكاليف انا..
- شششت .. متهزي هم لوالو.. هاديك صديقة قديمة ومغاتشد منك والو..
- معرفتش كيفاش غانرد ليك خيرك..
- انا مدين ليك بحياتي كلها.. شحال مادرت ماغانوفيكش حقك..
داز النهار عادي .. نعست الغد ليه فقت مع شروق الشمس.. صوت الامواج فودني ونضت نتفرج فالشروق ونشم هواء البحر.. خرجت للبالكون .. حسيت بالنسمة كتلاعب خصلات شعري.. شفت لتحت بانلي مروان جالس على الاحجار وشاد صنارة الصيد بيديه.. ولابس طربوش للصيادة .. متواضع بزاف.. بقيت كنتأمل فيه وكيفاش كيتعامل بعفوية مطلقة.. خلوته مع نفسه .. وصبره.. صفات كنكتشفها فيه نهار على نهار.. مقدتش نبقى غا كنشوف فيه لبست حوايجي ونزلت عنده..
- مروان..
- صباح الخير مدام منى .. كيصبحتي..
- متبقاش تقولي مدام منى..انا منى وصافي..كما انا كنعيطلك مروان وصاف..
- واخا متافقين امنى..
- صيدتي شي حاجة ولا غير جالس..
- ههه كل نهار وكيفاش.. بعض المرات الحوت كيغضب منا ومكيخليناش نصيدوه.. بعض المرات كيكون وافر..فالنهاية الصيد ماشي على قبل الماكلة.. الصيد اختبار.. كيختبر الصبر .. والهدوء..وحتى الحب...
- شنو علاقة الحب بالصيد..
- خاصك تجربي الصيد باش تعرفي علاقته بالحب .. بغيتي تجربي؟..
- مكرهتش..
- هاكي شدي الصنارة مزيان .. تقيلة ياك ..
- اه تقيلة ..
- مازال غاتقال كتر مللي تصيدي شي حوتة خصوصا الى كانت كبيرة..
- ههه او هادشي غريب مكانش يصحابلي الصيد هاكا .. صعيب بزاف..
- ماشي قلتلك اختبار؟؟ المهم شدي من اليد دالصنارة بالاسرية ديالك.. باش دوري الموطور ديالها بالايمنية ديالك .. مللي تحسي الصنارة كتجبد من يدك عرفي راه شي حوتة حصلات فالطعم،. ديك الساعة دوري.. غاتبقاي بزاف ونتي كدوري فيها عاد تتهزليك الحوتة ولكن عندك يتعقد ليك الخيط..
- هاهي كتجبد..
- يالله ديري داكشي اللي قلتلك.. دوري ..
- هانا ..
- زيدي ومتخلعيش ...
- واااااو حوتة .. ههه ناري درتها .. صيدت لاول مرة فحياتي ..
- ههه بصحتك.. هي غاتغدينا اليوما.. ههه حوتة كبيرة ..
- هههه انا مامتيقاش راسي.. هه هادشي رائع .. وبزاف..
- غانستناك كل صباح تصيدي معايا ..
- موافقة ..
-ههه الصيادة منى..
تغدينا بداك الحوتة وطيبتها بيدي .. بقا كيشكر فطيابي.. داز نهارنا زوين .. الغد ليه كنت فالموعد.. لقيت مروان جايبلي عدة الصيد ليا ..
- هادو دياولك من اليوم..
- بالصح .. انا فرحانة بزاف الله لايخطيك ..
0 Commentaires