الجزء 14
دازو ايام وانا فالدار تحسنت وليت مزيانة والطبيب قالي باللي نقدر نوض ونعيش عادي .. فكرت انه مصطفى دابا غايكون قالب الدنيا سفلها على علاها كيقلب عليا.. اكيد يكون مشا عند ماما وخلعها عليا .. خديت التلفون ..وصونيت لماما..
- الو ماما ..
- منى .. فينك ابنتي تخلعت عليك.. اشنو واقع مفهمت والو..
- ماما عنداك تقولي لمصطفى باللي اتصلت بيك.. انا هربت منو .. حيت ضربني الحيوان وطيح الولد اللي فكرشي..
- قالهالي ابنتي وهو نادمان بزاف وغايحماق عليك.. خايف عليك.. فين مشيتي..
- معرفتش شنو قاليك حتى حنيتي عليه اماما .. ولكن انا مستحيل نرجع عندو مازال.. المهم انا اتصلت بيك باش نقولك باللي انا لاباس..
- فينك ابنتي دابا.. دار باك اولى بيك .. رجعي وتفاهمي مع راجلك .. ماشي من الاصول تباتي برا ونتي مزوجة.. اجي لدار باك ابنتي وميكون غا خاطرك.. فين بايتة ومع من
- حتى نكون مزيانة ونجي .. انا بايتة عند وحدة من صحاباتي.. المهم غانسد دابا .. حتى بلاتي ونصونيلك..
المرا كيفما كانت .. كتبقى مذنبة.. فنظر المجتمع والاهل.. واخا كانت مقهورة.. واخا شايفينها كتعدب وكتاكل الدق .. خاصها تصبر.. باش ماتهدمش دارها.. وايلا هضرات ونتافضات من الظلم.. كتسمى مذنبة .. وفيها العيب.. اما الراجل.. شنو ما دار .. كيبقى راجل وحتى حاجة مكاتعيبو.. لا منسكتوش على هادشي.. كل واحد يتحمل مسؤليته.. سواء كان الراجل او المرا.. ياك كلنا غانتحاسبو قدام الله سبحانه وتعالى فيوم القيامة.. كلنا غانتحاسبو على كل اخطاءنا.. فيوم القيامة ماغتحاسبش غير المرا.. وغايقول على الراجل راجل وميتعابش ..ياخوفي فهاد المعركة اللي كنقلب فيها غير على حقي .. نخسر بسبب عائلتي .. عائلتي واخا لاباس عليها كما كيقول مصطفى.. ولكن محافظة جدا .. والمرا فيها خاص تطيع وتسكت.. وتصبر كما كان الحال.. الطلاق فعائلتي معدوم.. يا خوفي من اللي جاي..
- ممكن ندخل؟
- اه اجي امروان..
- مالكي ساهية فاش كتفكري..
- غا فالدنيا.. قوللي واش كتعرف شي محامي مزيان وموثوق به ..
- اه .. المحامي ديالنا مزيان..
- لا انا مبغيتش المحامي ديالكم.. بغيت شي محامي معندو حتى علاقة بكم ولا بمصطفى..
- عندك شي قضية باغية يشدهالك..
- اه باغا نرفع قضية طلاق على مصطفى..
- كنتأسف..مكنتش باغي يوصل بيكم الحال حتى هاد الدرجة مكنتش باغي حياتي تكون سبب لفراقكم.. تأليف دودي
- هادي غا النقطة اللي افاضت الكأس.. انا ومصطفى بنا شحال من حاجة تستاهل نتفارقو بسبابها .. غير انا صابرة..
- اللي تشوفيه فمصلاحتك ديريه.. انا غانهضر ليك مع واحد المحامية.. وهي غاتكون تحت امرك..
0 Commentaires