أكرهه وأحب كرهي له - الحلقة 15

الجزء15
خفت بزاف بقيت يوماين سادة عليا فداري كلما سمعت شي حس كنقول هادو البوليس جاو يهزوني ..وفنفس الوقت كنفكر فهشام ..كيفاش غيكون واش تكون صحته مزيانة ..خفت وندمت على داكشي اللي درتو بزاف ..الغد ليه فكرت فيه وقلت غنمشي نطل عليه من بعيد نطمئن ونجي بحالي ...مشيت بتردد كبير وخوف كنمشي وكنرجع ..خايفة بزاف مللي دخلت للسبيطار واتجهت للغرفة ديالو ..حتى شدني شي حد من دراعي تلفت ولقيت اخر شخص منت كنتوقع نشوفو فهاد البلاصة وفهاد الوقت هادا ..تلفت ولقيت عجوزتي ام عماد ..قالتلي ريم اش كديري هنا ..تلعثمت وقلتلها جيت ندير شي تحاليل نطمئن على صحتي ..ولكن نتي اش كديري هنا واش مريضة؟؟ 
-لا ابنتي ..جيت تطل على واحد الشاب بحال ولدي ..اجي نطلو عليه بجوج ..جراتني من يدي ودخلاتني عند هشام ..انا تصدمت ..هو شاف فيا بواحد الثقة بالنفس كأنه عارف بأنه غيشوفني ..انا كنت خايفة من حاجة وحدة ديك الساعة وهي انه عجوزتي غتفضحني ..
-هشام ..ولدي لاباس عليك كيبقيتي شوية ..هانا جبت ليك معايا ريم ..عارفاك غتفرح مللي تشوفها 
-الله يا ودي اخالتي ..ريم راها بحال ختي ..لاباس عليك اريم 
انا ديك الساعة تخلطو فيا كاع الوان الطيف ..ريم كيقولها بكل سهولة كأنه من ديما كيعيطلي بيها ..العرق كان كيمطر من وجهي ومقدرتش نطلع عينيا حتى نطقت عجوزتي 
-ودابا تبادلتو الادوار هي غتولي تتهلا فيك كيما كنتي كتتهلا فيها مللي كانت هي فالسبيطار ..
نطقت بسرعة اينا سبيطار ..فوقاش هادشي 
-نسيتي ابنتي ..هشام هو اللي عتقك لينا من الموت مللي كنتي باغا تنتاحري ..وهو اللي غيدك بالمينوط عند الناموسية باش متهربيش وكان كيظل حداك بالليل وبالنهار وكيتهلا فيك ..ياه ابنتي اش غتفكري نتي فديك الرقت مكنتي كتشوفي والو قدامك وكان عقلك غايب بالصدمة ..الله يكتر خير هشام هو اللي تهلا فيك ووقف معانا فداك الوقت منساش خير صاحبو وولا فمقام عماد ولدي ولا اكتر ..منساش الطفولة ديالهم اللي دوزوها بجوج وولاو كتار من الخوت ..الله يبعد عليك ولاد الحرام اولدي والله يحميك ويحفظك لينا 
انا صدمتي كانت كبيرة ديك الساعة..اه تفكرتو هو اللي شدني مللي كنت باغا نتلاح من سطح المستشفى ..كيفاش متفكرتوش ..هادشي كيعني انه كان عايق بيا من اللول ...كيفاش انا غبية حتى هاد الدرجة هو كان كيمعنيلي مرة مرة ..
مللي ضحك اول مرة مللي قلتلو سميتي ميساء..كان كيمثل عليا حتى فحبه ليا ..وكدب عليا بخصوص عائلته ..انا غبية حتى هاد الدرجة ..مقدرتش نهضر سلمات عليا عجوزتي وعلى هشام ومشات وانا بقيت تما ضروري نواجه ..ما منو هروب ..#dodi_elaissati
-ريم 
-علاش قتلتي عماد 
-واش كاين شي حد كيقتل خوه ..انا وعماد كبرنا مرا كيفاش يمكنلي نقتلو وعلاش ..المافيا لعباتليك بعقلك باش تقتليني وحتى انا داكشي اللي بغيت باش يطمئنو من جيهتي ونقدر نطيحهم فالشبكة وننتاقم لصديق عمري ولبنتو وحتى مرتو