أكرهه وأحب كرهي له- الحلقة 14

الجزء 14
بقا كياكل وكيحاول يوكلني ولكن انا مكنبغيش ..مللي كمل الماكلة ..نضت وتبعني كيهضر ويحاول يفوج عليا ولكن انا قلبي معالم بيه الا الله ..شوية وهو كيهضر معايا وكيضحك شفتو شد كرشو بيدو ..وبدا يتزير ولكن كيحاول ميبينش ..انا بقيت ساكتة وكنشوف فيه وخايفة ..مبقاش بزاف حتى بدا يتقطع قدامي ويبكي ويزير على كرشو ..بدا كيغوت بجهد ..وعرقان كلو انا ديك الساعة خفت ونضت ..شفتو طاح فالارض وكيتقطع وانا قلبي كيتقطع معاه ..خفت بزاف وندمت علاش درت هاكا انا ماشي قتالة ..وماشي غدارة هو تاق فيا ولكن انا غدرتو ...شوية سكت وغيب وبقا مكمش فالارض ..واش مات؟ مشيت كنحرك فيه ..هشام هشام فيق عفاك سمحلي ..شفت فيه عماد اللي ميت ...ديك الساعة بديت نبكي بواحد الهستيرية لا فيق عفاك ..رجعت بالي وقلبته لقيتو مازال كيتنفس ..جريت دغيا هزيت تيليفوني وعيطت للاسعاف ..خاصني نعتقو باي طريقة ...خاصو يعيش ....جات الاسعاف وهزوه ..سولوني مالو قلتلوم منعرف ..داوه بسرعة للمستشفى وانا نتفكر الماكلة مشيت دغيا تخلصت منها كلها ومخليت ليها اثر ..ولحقت عليه ..بقيت فكولوار السبيطار كنستنى يخرج الطبيب ...تعطل بزاف ..ها هو خرج ..
-دكتور ..واش عتقتيه ..كيداير لاباس عليه
-نتي مرته ؟
-لا انا صديقته 
-خاصنا نعيطو للبوليس بسرعة ..السي هشام تعرض لمحاولة قتل بالسم ..
-خفت وقلتله :واش مات؟
-لا لحسن الحظ عتقناه وخلصناه من السم ..هو مدين ليك بحياتو لانك جبتيه لسبيطار فالوقت المناسب 
-الحمد لله 
بقيت كنستنى فالكولوار الفرصة باش نشوفو غا من بعيد ..باش نمشي قبل ميجيو البوليس ...شوية بانتلي واحد المرا فحالة كتشفي ..كتبكي بواحد الاسى وكتجري لجهة الغرفة ديال هشام حتى حبساتها واحد الممرضة 
-ممنوع الالة 
-اهئ اهئ ..ولدي ..حرام عليهم شكون بغا يقتلي ولدي ..الله ياخد فيهم الحق ...اهئ اهئ ..الله يحرق قلبهم كيما بغاو يحرقو قلبي على ولدي 
قربت منها بهدوء وبديت نواسيها ..شكون هو ولدك ؟
-اهئ اهئ هشام ولدي هشام ..بغاو يحرموني من ولدي 
انا هنا تصدمت ..واش هادي ام هشام ..هو قالي معندي حد وعايش بوحدي فالدنيا ..كيفاش يعني كان كيكدب عليا ؟؟ عندو ام وماشي بعيد تكون عندو عائلة..شنو مخبي تاني عليا اهشام شنو ..مقدرتش نصبر مشيت بلا منطمئن على هشام خفت لا يجيو البوليس ويستجوبوني ..انا خاصني نهرب ..اكيد هشام مللي غيفيق غيحبسني ..وغيبلغ عليا غيقول ليهم باللي انا اللي درتلو السم ..غانحاول نختفي هاد اليوماين ...