الجزء 13
بقيت فداك الدار حتى جا مروان وجاب معاه الطبيب وواحد البنت... باينة فيها هي اللي غاتقابلني هاد المدة.. الطبيب قاللي باللي فقدت بزاف ديال الدم.. وخاصني نديها فصحتي ومنتحركش من الناموسية .. وناكل مزيان..
مروان: انا غانتهلا فيها ادكتور متخمامش..
شفت فيه بواحد النظرة.. دابا هادا واش غا كيمتل عليا ولا بصح هاكا داير.. بعد داكشي اللي شفت مع مصطفى.. مستحيل نتيق فشي راجل مازال.. كلشي بحال بحال.. كيبغيو السيطرة على المرا..
بعدما فحصني الطبيب وعطاني الدوا.. جابتلي ديك البنت الماكلة.. كليت .. بقا مروان جالس معايا..
- قوليلي .. علاش كتهربي من السي مصطفى.. ا بغيت نقول من راجلك..
-ضربني لحمار وطيحلي الولد من كرشي.. اجي نتا اش كنتي كدير فالسبيطار .. كنتي جاي تزور شي حد ولا ..
- اه كنت جاي نزورك نتي ..
- وباش عرفتيني فالسبيطار..
- السي مصطفى اتاصل بالواليد ديالي صيفطلو الشيفور يهزك للسبيطار .. وهو عرف من الطبيب انك درتي اجهاض .. وقلت من الواجب اني نزورك .. ولكن مكنتش عارف ان راجلك ضربك وهو السبب فاجهاضك..
- الله ياخد فيه الحق.. انا مبقيتش باغا نبقا معاه ولا نشوف وجهه مازال..
- هو كيبغيك بزاف .. انا شفتو كيفاش كيخاف منك وعليك.. وكيغير عليك..
- فين شفتيه ..
- كنت متردد بزاف قبل مانجي عندك نشكرك.. كنت خايف وكنت كنراقبكم من بعيد.. كل مرة كتخرجو فيها كان حريص بزاف عليك.. مكيحمل حتا واحد يشوف فيك .. وتعامله معاك.. كان تعامل واحد كيعشق مرتو حد الجنون..
- مصطفى مكايبغي حتى واحد.. مصطفى كيبغي غير الفلوس.. صافي براكة من الهضرة عليه .. كل مرة كتفكرو .. كيفكرني بولدي وكنزيد نتقهر.. انا باغا ننعس...
- واخا رتاحي.. انا راني حداك الى حتاجيتي شي حاجة عيطي عليا ..
النعاس... هو المفر اللي كنهربو بيه دائما من شي واقع مؤلم.. مع اننا مكنعسوش.. ومكنرتاحوش.. ومكندوقوش مذاقو.. ومافيناش النعاس اصلا.. الا انه السبيل الوحيد باش نهربو.. شحال من وحدة منكم كتهرب به؟ بقيت فداك الدار .. مهليين فيا كيجيبولي الماكلة حتى الناموسية.. وكنشرب الدوا تحسنت شوية.. ومروان معايا ..
- بغيتك تعاودلي كلشي من الاول .. الحقيقة.. شحال عطا الواليد ديالك لمصطفى..
- خاصك تعرفي اني مبدئيا مكنتش عارف انه شرا منه القلب بالفلوس.. حتى داك النهار اللي جيت عندك فيه .. جا مصطفى عند الواليد وبقا كيدابز بالجهد.. وكيقول للواليد ديالي ياك اتفقنا حتى واحد ميعرف داكشي اللي بينا.. لاش جاي ولدك .. شنو بغيتي مني مازال.. قالو الواليد.. نتا بعتي وانا شريت .. والتزم حدودك معايا..
تما عرفت الحقيقة وبقيت على بابا حتى قالي كلشي.. بقا فيا الحال.. وبقيتي فيا نتي .. وبقا فيا حتا راسي.. يعني مقدرتش نعيش على حساب سعادة ناس اخرين.. عذريني عفاك
بديت كنبكي ودموعي كينزلو بالجهد .. انا ترزيت فولدي.. هاداك راه الكبيدة ديالي.. كيفاش بغيتوني نعذركم وانا شايفاكم كتقطعو فولدي وكتبيعو وتشريو فيه.. منسمحش ليكم دنيا ولا اخرة.. اهئ اهئ..
- عفاك امنى.. متبكيش .. قلب ولدك مازال كيدق .. سمعيه.. اجي سمعي هنا الدقات ..
نزلت لعند صدرو وحطيت ودني عليها ... كنسمعها.. دقات قلبو .. هادو دقات قلب ولدي .. اهئ اهـئ .. هيثم .. سمحلي اولدي.. سمحلي .. 😭ولدي..
- عفاك متبكيش .. انا غانبقا معاك.. انا غانكون حداك ديما .. باش عمرك ماتحسي بالم وفراق ولدك.. تأليف dodi elaissati
0 Commentaires