الجزء 12
فقت على هضرة الطبيب مع مصطفى..
الطبيب: السي مصطفى متخافش عليها راها بخير.. حنا مبغيناش نبلغو البوليس حتى نعرف منك علاش درتي فيها هاد الحالة...
مصطفى: انا نعطيكم اللي طلبتوه .. انا غانتفاهم مع مرتي وغانخليها تسمحلي .. غا مدخلوش البوليس بيناتنا..
الطبيب: يكون خير.. اهم شيء دابا هي الراحة التامة ومتبذلش اي مجهود واخا يكون بسيط.. لان الاجهاض ماشي ساهل.. الا مشات حتى وقعات ليها شي انتكاسة فمعمرها تقدر تولد مرة اخرى..
مصطفى: كيفاش شنو قصدتي بالاجهاض..
الطبيب: واش ماقالولكش باللي درنا ليها عملية اجهاض دابا.. حيت بنادم اللي فكرشها مات.. بسبب الضرب العنيف اللي تعرضات ليه منك..
مصطفى: واش مرتي كانت حاملة؟؟ 😮
الطبيب : اه كانت حاملة واش مفخباركش ؟
مصطفى: لا .. لوكنت عارف اكيد مكنتش غانمد يدي عليها.. حتى هي موحال واش تكون عارفة راسها حاملة..
انا تصدمت مللي سمعت ديك الهضرة.. زيرت على راسي باش ميطيحوش دموعي وحبستهم .. قدر الله وماشاء فعل.. الله سبحانه وتعالى اكيد غندو حكمة منهادشي.. ومبغاش نبقا مربوطة بهاد الانسان .. معرفت نولد ولد اخور يبيع كلاويه ولا كبدته على قبل الفلوس.. بقيت دايرة راسي ناعسة الطبيب سالا الهضرة مع مصطفى ومشا.. اما راجلي العزيز.. جلس عند راسي بقا يتلمس عليه ويدوزلي على وجهي وراسي.. وبدا يبكي.. غريب علاش كيبكي هدا.. واش على ولدو اللي فكرشي.. ولا حيت خاف نتفارق معاه وكيبكي حيت ضربني .. ولا كيبكي على حالته اللي وصل ليها .. المهم من هادشي كله اني زيرت على راسي ومبينتلوش اني فايقة حيت مافيا مايهضر معاه .. من هنا الفوق مايشوف مني حتى كلمة لا ديال الخير ولا دالعيب.. حتى الدباز مندابزوش معاه.. حيت غانكون دايرالو القيمة ..
شوية سمعت تلفونو كيصوني..جاوب وسمعتو كيقول انا جاي دابا... ناض وخرج .. معرفتش فين مشا ولكن هادي فرصة ليا.. خاصني نخرج من هاد المصحة لللي شاري الناس فيها بفلوس ولدي.. نضت وانا ماقداش نوقف على رجليا.. تمشيت بزاز.. حاسا السخونية طالعة معايا والعرق كيقذر مني.. القوة مافياش وحاسا حتى الدم مافياش.. اسوء احساس .. مجهود بسيط حسيت النفس غايتقطع فيا.. ماشي وقتو خاصني نمشي من هنا.. نزلت وانا كنجر فراسي بزاز وخايفة يشوفني شي حد كنتخبا فحال الفار.. حتى لقيت قدامي واحد بنادم.. اش جاي يدير هادا .. كيشوف فيا مصدوم وهاز بوكي دوفلوغ فيديه ..
- مدام منى.. اشنو اللي منوضك من بلاصتك .. نتي مازال مريضة .. شدي فيا تكاي انا نعاونك ترجعي لبلاصتك.. الى بغيتي نجيبلك شي حاجة نجيبها ونقول للفرمليات يجيبوها لاش معدبة راسك نتي..
- انا مبغيت منك والو عطيني بالتيساع .. ولا عرفتي اه بغيت ... بغيتك تخرجني من هنا .. بغيت نهرب من مصطفى.. هادشي اللي بغيت منك..
- ولكن .. علاش تهربي من سي مصطفى..
- الا مبغيتيش عطيني بالتيساع ودير راسك ماشفتينيش ..
- لا لا صافي .. انا غانعاونك .. شدي فيا ...
- خاص ميشوفنا حتى واحد .. مبغيت مصطفى يعرفلي طريق ..
- واخا انا غنتصرف ..
خرج تلفونو صونا لشي واحد جا .. قالو تصرف وهضر مع اللي خدامين هنا .. هداك حنا براسو في اشارة منه لطاعته ليه .. هو شد فيا وخرجني .. بحال الى المصحة فداك الوقت مافيها حتى واحد بانولي الكاميرات ..
- ولكن غانبانو فالكاميرات ..
- متهزي هم .. معتصم غايتصرف ..
ركبت معاه فطوموبيل .. كانت كلاس بزاف .. مقدرتش نبدي اعجابي بهاد الشاب خصوصا اني فكل لحظة كنتفكر انه خدا قلب ولدي..
- شنو سميتك ..
- انا سميتي مروان ..
- واخا امروان.. خاصني نعرف منك بزاف دالحوايج .. ولكن اول حاجة واعدني انك متقول لمصطفى والو عليا..
- اصلا سي مصطفى مستحيل يشك انك معايا..
- سي مصطفى سي مصطفى.. هاداك مايستاهل غا المعيور..
- ههه.. واخا .. انا كنحتارمو حيت عنقني من الموت .. هادشي اللي كاين وحتى نتي كنحتارمك بزاف ..
- فخبارك فيك البراءة ديال الدراري الصغار..
- يمكن حيت هاز دابا لداخل ديال قلب طفل..
تنهدت وسكتت..
- مدام منى .. راكي صفرا بزاف .. انا غانتديك لشي سبيطار..
- لا .. مصطفى غايقلب عليا فيهم وغايلقاني .. وانا ماباغاش ..
- واخا انا نجيبلك الطبيب حتى لعندك .. غانمشيو لواحد لبلاصة اللي مستحيل يلقاك فيها..
بقينا ماشيين فالطريق بزاف ديال المسافة حتى مشينا لواحد الشاطئ بعيد على المدينة.. وقف حدى واحد الدار صغيرة ولكن زوينة باينة من التصميم ديالها .. نقدر نقول ميني فيلا ..
- هادي دارك..
-اه .. انا وقتي كله مدوزو هنا ..
دخلت بعدما شد فيا حيت كانت الدوخة متمكنة مني بزاف ..طلعني لواحد البيت .. كانت نعست فيه .. تأليف دودي العيساتي
- انا نمشي نجيب الطبيب .. مغانطعطلش بزاف.. الى حتاجيتي اي حاجة .. انا نخليلك نمرتي .. وها التلفون حداك صوني نجي طاير عندك..
- واخا ..
مشا خرج .. وانا بقيت كنفكر .. زعما يكون دابا مصطفى اكتشف اني هربت ..
0 Commentaires