الجزء 11
- كتعطي مبررات لوساختك.. مكتهمني حتى حاجة من هادشي اللي كتقول.. اللي كيهمني هو ولدي.. بعتي ولدك من لحمك ودمك.. كيفاش غادي نأمنك على نفسي..
- مكانش بيدي .. لوماكان السيد كيموت قدامي.. مكنتش غنفرط فولدي.. سمحيلي .. انا عارف اني غلطت حيت خبيت عليك.. ولكن كنتي فحالة خايبة بزاف.. ومكانش يمكن نقولك والو.. خلينا نبداو صفحة جديدة ومريضنا معندو باس..
- غنتيقك.. اسيدي.. ايوا تقدر ترجع للفقر .. وتتخلص من دوك الفلوس اللي بعتي بها القلب.. ولا لا؟
- منى.. هداك حقنا .. علاش غنتخلصو منهم.. فلوسنا هادوك..
- ههه .. كنت عارفة باللي العاطفة الوحيدة اللي عندك هي اتجاه الفلوس.. نتا مكنش يهمك الشاب ولا ولدك.. نتا كيهموك غا الفلوس.. وانا واخا دير اللي درتي .. مستحيل نسمحلك على هادشي .. طلقني وخليني نمشي بحالي ..
- مغانطلقكش امنى.. انا كنبغيك .. وماغاديش نقدر نعيش ونتي بعيدة..
- الفلوس غايخليوك تنساني.. تبارك الله راهم 500 دالمليون.. غاتجيبلك بزاف ديال العيالات .. واحسن وحدة فيهم .. اش باغي بوحدة بحالي .. معقداك فحياتك..
- للاسف .. القلب ديالي مقدرتش نتحكم فيه.. واخا كنحاول نكرهك بسباب داك الفرق اللي بينا ولكن مقدرتش .. نتي ديالي.. ومغاتمشي لحتى بلاصة..
- اناماشي حاجة .. وماشي ديالك.. ومستحيل نكون ديالك.. عرفتي علاش .. حيت نتا صحابليك باللي بالفلوس غاتقدر تشري الدنيا كلها.. ولكن لا ..
- اه غانشري الدنيا .. وكلشي غانقدر نديرو بالفلوس.. حتى نتي غاتكوني معايا.. كيجيتك دابا.. ونتي عارفة اني مابقيتش داك الفقير .. كيجيتك مللي عرفتي دابا باللي وليت لاباس عليا..
- جيتيني حيوان .. وعمري مغانشوفك نقي ..
مازال مكملت الهضرة حتى انهال عليا بالسب والضرب ..
- حيوان .. عمرك مغاتكون انسان نتا حيوان ..
- سكتي ولا غنقتلك.. وغانتهنى منك.. سكتي .. متجهلينيش .. سكتي ..
- حيواااان.. ونزيدك نتا نصاب وطماع .. وكل همك فهاد الدنيا الفلوس..
هو مازايد فالضرب .. حتى حسيت بالدم كينزل من تحتي .. سكت وماقدرت نوقف مازال على رجليا .. هو شاف الدم ..وانا القوة مبقاتش فيا .. تخلع .. وبدا كيقلبني..
- منى .. مالكي اش هاد الدم.. الله يا ربي اش درت .. منى سمحييلي .. والله ماقصدت .. اش غاندير دابا..
انا حسيت بحريق فكرشي .. جاني واحد الحريق صعيب بزاف.. هو هز تلفونو وصونا لشي واحد من صحابو .. جا وهزني مصطفى وانا مقادراش نخرج الهضرة من فمي .. تبكمت .. داني لمصحة قريبة .. انا مللي شفت مصحة محملتش راسي عرفتو غايخلصها من فلوس قلب ولدي.. الحريق مخلانيش نحتج .. ولا نقولو لا.. دخلوني دغيا سمعت الطبيب قاليهم دخلوها العمليات.. شوية غييبت ومابقيتش عاقلة على راسي ..
0 Commentaires