أكرهه وأحب كرهي له -الحلقة 10

الجزء 10
واحد النهار كنت فالجريدة ولمحتو جاي جريت بسرعة باش ميشوفنيش تخبيت ..كان قلبي غيسكت بالخلعة لا يشوفني تما وكلشي يتكشف بقا تقريبا شي ربع ساعة ومشا وخرجت من تما حتى انا بسرعة وقررت منبقاش نمشي باش منحصلش ..علاش مشا تما اش باغي مازال ياك تخلص من عماد وقتلو ..ولا كيتأكد باللي مبقاش شي دليل موراه ..علاش قتلو علاش الله يا ربي كلما تفكرت كتشعل العافية فقلبي ..تمشيت بزاف حتى بعدت من الجريدة بزاف ..بقيت كنتمشا حتى تلقاولي شي شمكارة..افين الزين منتشاوفوش ...واحد منهم شدني فيدي وبديت كنجرها منو طلق مني بعد مني ..مال الزين ماباغيش يجلس معانا شوية حتى بانلي فالارض ..طاح والدمايات كيسيلو منو ..كان هشام هو اللي ضربو ..تغوبش ودار شاف فلاخور اللي كلن شاد فيا طلق مني بسرعة وهرب مشا لحق عليه بسرعة وشبعو عصا خلاهوم فالارض وجا عندي انا خفت منو مللي شفتو بديك الحالة واش هاد القوة كلها واش انا كنتحدى هادا ومن نيتي باغا نقتلو كيفاش غنديرله ..غيشدني ويلويني بيد وحدة عندو ..قرب مني كنت خايفة منو بزاف جا عندي :واش لاباس مادارولك والو ..بقا كيتفحصني وانا خايفة وكنترعد ماشي من الشمكارة وانما منو هو ..حفظ الله اني متهورتش باش نحاول نقتلو بشي موس ولا شي حاجة اكيد نهايتي كانت غتكون مقتولة ولا محبوسة ..قربني عندو وعنقني وبقا كيهدن فيا :فين هي طوموبيلتك ولاش كتمشاي بوحدك فهاد الدروبة ..مغنتحملش يوقعليك ولو حاجة بسيطة انا عاهدت نفسي نحميك ...حاوطني فيديه بجوج وعنقني بشدة وباس لي راسي ..مللي حسيت براسي بعدت نفسي عليه ..هو تصدم من ردة فعلي وقالي سمحيلي مكانش يصحابلي بان هادشي غيزعجك..انا مغنبزز عليك والو ولكن مكرهتش تعطي لنفسك فرصة وليا حتى انا نتقرب ليك ..انا حنيت راسي ديك الساعة محملتش راسي مستحيل نخلي شي راجل يقرب مني ..هو لقاني هكاك ساكتة ..وقالي زيدي نوصلك ..مشيت معاه قلتله وصلني لواحد العمارة وهمتو باللي انا ساكنة تما ..جيت نودعو شدني من يدي وقالي 
-ميساء ..تقبلي نسهرو انا وياك اليوما اونصومبل
قبل مننطق حطلي يدو على فمي وقالي ..بلا متقولي لا عفاك وافقي عفاك 
-واخا انا موافقة ..
حسيت بيه فرح بزاف مللي وافقت قالي غنجي نديك مع ٩ دالليل نكون واجدة ودعتو ودرت راسي دخلت للعمارة خليتو حتى مشا وخرجت شديت طاكسي بسرعة ومشيت لداري ..هاد هشام شحال كيبان جونتي مللي كيكون معايا وكيبان ملاك وميقتل حتى دبانة وفنفس الوقت كنخاف من الوجه الثاني ديالو كنخاف يكشفني كنخاف منو وكلما عرفتو اكتر كنخاف منو وكنتأكد من كلام ادهم ليا بأنو ماشي ساهل وماكر وذكي ..