الخطيئة 46-47-48-49-50

الخطيئة- الحلقة السادسة والاربعون

تإليف دودي العيساتي

دازت نهى للاوطيل ومشات لعند عماد وصاتو الى جات هاجريعلمها.. رجعات للدار وبقات كتستنى.. وصل الليل واتصل بيها عماد وعلمها باللي هاجر وصلات ومعاها واحد الراجل.. وطلعو للغرفة..

حاتم: حبيبة اش كديري..

نهى: عمري انا جاية .. غاناكل شي حاجة ونجي..

حاتم: سمعتك كتهضري مع شي حد..

نهى: غا مع الدراري ديال الريسطورون .. هاني جاية..

دخل حاتم للبيت وبقات نهى كتستنى اتصال..

غالي: مادام

نهى: اش درتي..

غالي: كما اتافقنا .. طفينا الضواو ..باش يطفاو الكاميرات.. بعدما جاو الرجال اللي دارو العملية .. وعلى حسب مراقبتنا كانت هاجر دخلات للدوش.. قتلو الغول وخرجو دغيا.. وكما طلبتي منا اتاصلنا بالشرطة..

نهى: مزيان 😀.. وهاجر شدوها ولا مازال..

غالي: هانا كنشوف فيهم كيخرجوها وهي بالبينوار دالحمام سمعي سمعي

هاجر: مقتلتوش.. كنقسم ليكم اني مقتلتوش..

نهى: ههههه .. هادشي قليل فحقك اهاجر..

غالي: كيجيناك الالة..

نهى: كتستاهلو مكافئة..

غالي: خيرك سابق الالة..

نهى: يالله تهلا فراسك وشوف مبغيتش حس الصحافة فالاوطيل.. مناقصينش..

غالي: كوني هانية ..

مشات نهى للبيت لقات حاتم ناعس .. تخشات حداه وفيقاتو..

حاتم: تعطلتي احبيبة..

نهى: حياتي انا اسفة.. ولكن عرفتي بغيت نقصر معاك هاد الليلة.. انا ميزاجي زوين بزاف وفرحانة..

حاتم: شكون اللي فرح حبيبتي نشكره

نهى: هه البيبي بدا يتحرك..

حاتم: 😍 بالصح!؟

نهى: اه كنحس بيه ..

حاتم: كنبغيك بزاف احياتي ..

نعسات نهى وحاتم.. الصباح ناضت نهى وبدلات حوايجها.. ومشات للاوطيل..

عماد: مادام نهى.، كما وصيتينا

نهى: اهم شيء حتى واحد ميعرف شي حاجة.. وصيتي الموظفين

عماد: اه .. وكلنا قلتا للبوليس هضرة وحدة.. انه حتى واحد مشاف شي حد دخل للغرفة من غير هاجر.. وانها ديما كتجيب معاها رجال وجوهم ماشي بريئة..

نهى: غنعطي مكافئة لجميع اللي خدامين معانا..

جلسات نهى وهي فرحانة.، والخدامة كيدخلو عندها وكل واحد كتعطيه شيك كمكافئة حتى دخلات عندها واحد البنت فالميناج.

نهى: هاكي .. شكرا على اخلاصك..

البنت: ماشي من حقي ناخد هاد الفلوس بلا منكون وفية 100% ..

نهى: اش كتقصدي

البنت: لالة نهى انا بنت دريويشة بزاف وعائلتي مابحالهمش.. ومعندي لا ظهر ولا حامي غا الله.. وماشي قدكم ولا قد الناس اللي معادينكمش..

نهى: شنو بغيتي تقولي..

البنت: نهار العرس ديالك.. كنت خدامة هنا.. وشفت الراجل اللي عندو اللحية دخل .. وكان متردد بزاف.. حط الصاك ديالو على جنب .. ودخل بقا كيشوف فيك من الباب.. شوية شفت واحد جاي بشوية وهز الصاك ديالو.. ومشا.. معرفتش فين مشا.. مللي رجع داك الشاب وكان كيمسح فعينيه باينة كان كيبكي.. بدا كيقلب على صاكو ملقاهش.. ومشا دغيا وهو مازال كيحك فعينيه..

نهى: 😰 متأكدة من هادشي اللي كتقوليه..

البنت: غانتحاسب عليه يوم القيامة.. وانا برأت ضميري..

نهى: علاش مهضرتيش النهار الاول

البنت: خفت.. انا ماشي قدهم.. اللي قتل 300 واحد.. واش غايحير فيا انا..

نهى: 😭واش شفتي شي حد اخور..

البنت: لا الالة.. مشفت غا اللي قلت..

نهى: هاكي هادو.. وغادي نقولو هادشي للبوليس.. عمر بريئ.. كنت عارفة .. عمر 😭

البنت : بغيت نقوليك حاجة اخرى

نهى: قولي..

البنت: انا مكنتش بوحدي.. داك النهار كانت معايا واحد الخدامة اخرى..

نهى: بجوج بيكم سكتو..

البنت: اعذرينا الالة.. حنا ماشي قدكم..

نهى: عيطي ليها واجيو معايا..

تأليف دودي العيساتي

الخطيئة- الحلقة السابعة والاربعون

تأليف دودي العيساتي

ركبات نهى معاها البنات فالطوموبيل .. ومشات للبوليس .. اللي بدا معاهم التحقيق واستجوبهم.. نهى اللي بقات تما النهار كله .. لقات اتصال من حاتم..

حاتم: حياتي فينك..

نهى: انا راني فالكوميسارية..

حاتم: كيفااش؟؟ اش كديري تما..

نهى: حتى نجي ونعاودليك..

حاتم: انا جاي عندك فورا..

نهى: لا بلاش انا غانجي..

حاتم: اش هاد الهضرة.. انا جاي..

بقات نهى كتسنى حتى لقات حاتم جا..

حاتم: شنو كاين..

نهى: حاتم عمر بريئ

حاتم: شكون عمر..

نهى: ام ولد خالتي الضاوية اللي كانو خدامين عندنا..

حاتم: اللي كانو شادينو فقضية التفجير..

نهى: اه.. تخيل برييء انا كنت متأكدة..

حاتم: مزيان.. الله يعاونو ونتي لاش جاية هنا..

نهى: حاتم .. علاش كتهضر هاكا..

حاتم: شنو بغيتيني ندير.. مللي نلقى مراتي وام ابنتي.. جاية للكوميسارية وعلى قبل شكون.. راجل اخور..

نهى: حاتم بلا هاد المزايدات عفاك..

حاتم: واش مغانساليوش.. زيدي قدامي..

نهى: حاتم ..

حاتم: غاتجي ولا نديك بزز.. يالله ..

شدها من دراعها وداها للطوموبيل ..

نهى: انا غانركب فطوموبيلتي .. 😓

حاتم: واخا غير طلقينا .. انا غانكون موراك..

ركبات نهى طوموبيلتها حتى وصلو للفيلا .. ودخلو.. وبدا حاتم كيغوت..

حاتم: المفروض انا مزوج بوحدة مكتعرف حتى راجل فالدنيا من غيري انا.. مكاين لا عمر ولا حمادي.. انا راجل حر ومغيار .. ومنحملش مرتي تكون كتعرف اي واحد واخا يكون صديق طفولتها .. واخا يكون خوها كاع.. سمعتيني.. وديك الحياة اللي كنتي عايشاها مع والديك وديك الحرية الزائدة نسايها.. دابا وليتي مرت راجل وهو اللي كيحكم عليك فهمتي..

نهى: اش هاد الاسلوب وعلاش كترفع صوتك..

حاتم: هادي ماشي عيشة بناقص منها..

دخل حاتم لبيتو وزدح الباب اما نهى بقات جالسة وحطات يدها على راسها..

نهى:(بصوت خافت) واخا يكون خوها!!! المصيبة انه ماشي خويا.. 😞

بقات نهى متكية حتى خرج حاتم من البيت عاود.. ولكن هاد المرة هادئ شوية ..

حاتم: نهى انا اسف .. مقصدتش نغوت عليك.. ولكن حسي بيا انا كنغير عليك حتى من الهوا اللي كيلمس وجهك.. كنغيير بزاف ومغنتحمل يشاركني فيك اي واحد .. هاداك مهما كان راجل.. وانا.. كنغير .. غرت من الفرحة اللي شفتها فعينيك على قبلو.. انا عارف انه بحال خوك ولكن.. عذريني عفاك.. ماشي لخاطري

نهى: انا اللي اسفة .. حماسي زاد شوية حيت بغيت الحقيقة تبان وكيهمني نعرف شكون اللي قتل والديا.. مراعيتش مشاعرك..

حاتم: كنبغيك بزاف انهى.. بزااااف .. نتي اول مرا فحياتي واخر وحدة.. وخايف تضيعي مني..

عنقها وكمل هضرتو..

حاتم: عفاك انهى.. واعديني انك تبقاي معايا ديما..

نهى: كنواعدك 😔

بقات نهى ديك الليلة كتفكر فالاحداث اللي وقعو.. بعدما بانت براءة عمر.. واش تقدر تتخلى على حاتم للي متمسك بيها .. واش تقدر ترجع لعمر؟

نهى: يا ريتني سافرت.. يا ريتني ما تسرعتش وتزوجت...

صبح الصباح وفاقت نهى بقات كتستنى يخرج حاتم..

حاتم: حياتي بغيتي نمشيو نفطرو فشي بلاصة؟

نهى: واش مغاتمشيش للخدمة..

حاتم: ليوما غاناخدو كونجي.. باش نبقى معاك.. وباش نكفر على الذنب اللي درتو معاك البارح مللي غوتت عليك..

نهى: مم هه واخا..

حاتم: شنو نخرجو؟؟

نهى: واخا غانبدل حوايجي ونخرجو...

بقات نهى كتهضر فخاطرها"غانموت ونعرف الاخبار .. اش وقع لكلشي .. هاجر وعمر والبنات اللي شهدو.. اووف ماشي وقت الرومانسية احاتم.. بحال الى حاس بيا وباغي يمنعني بطريقة فنية.."

صاوبت نهى راسها وخرجت هي وحاتم.. حتى وصلو لواحد الكافي كلاس.. بقاو كيفطرو وكيهضرو ولكن نهى عقلها بعيد.. ماشي معاها..

حاتم: فوقاش غانمشيو للطبيب 😌

نهى: السيمانة الجاية..

حاتم: متشوق نمشيو ..

نهى: حتا انا هه

بقاو نهى وحاتم كيفطرو شوية استأذنات تدخل الطوليط .. ناضت ودخلات الطواليط وهزات تلفونها دغيا..

غالي: مادام لاباس عليك..

نهى: لاباس.. قولي اشنو الاخبار..

غالي: ليوما غايدوزو الشهود قدام القاضي وغالبا غيحكم عمر بالبراءة.. كلشي كيستنى وحتى عائلته.. كلشي كيستناه يخرج اليوما.. وحتى الصحافة..

نهى: هاجر.. !؟؟ شنو اخبارها

غالي: صاحبنا اللي قتل الغول خوا البلاد هو ورجالو.. عيات هاجر تعيطلو مكاين خبر.. ولكن المحامي رشاد جا عندها .. وهو اللي كيترافع عليها

نهى: رشاد!!

غالي: اه .. وفخباري باللي غاتتطرطق .. حيت خوتنا فالاوطيل كلشي شهدو معاها.. وتلفونها لقاو فيه ميساجات للغول وهي كتستدرجو.. القضية مفصلة عليها .. موحال واش تقدر تخرج من هنا..

نهى: مزيان.. فرحتيني.. شوف راجلي ليوما لاصقني.. متتاصل حتى نصونيلك انا.. واخا؟

غالي : هو هاداك امادام..

نهى: الله يعاونك..

تأليف دودي العيساتي

الخطيئة- الحلقة الثامنة والاربعون..

تأليف دودي العيساتي

نهى: تعطلت عليك حبيبي؟

حاتم: اه ههه انا كنتوحشك ونتي معايا فمابالك ونتي بعيدة..

نهى: لهلا يخطيك عليا

بقات نهى مع حاتم كيهضرو.. النهار كله وهما يتساراو... حتى الليل .. مشاو للفيلا.. الصباح فاقت نهى مالقاتش حاتم حداها.. ناضت بسرعة طلات من البالكون ملقاتش طوموبيلتو.. عرفات انه مشا للخدمة.، دخلت دغيا خدات تلفونها واتصلات بغالي..

غالي: صباح الخير مادام..

نهى: غالي اشنو الاخبار..

غالي: زوينة بزاف.. عمر خرج براءة.. وراه فالدار مع عائلته دابا..

نهى: هادا اسعد خبر سمعتو فحياتي .. انا فرحانة بزاف... انا غانجي دابا نشوف هاجر.. عندي معاها لقاء مهم.. ومنبعد نمشي لعند عمر..

غالي: امرك الالة..

بقات نهى كتشوف فالمراية وهي فرحانة..

نهى: كنت متأكدة انك عمرك مغدرتي بيا اعمر ..

بدلات حوايجها دغيا وخرجات .. مشات للكوميسارية.. بعدما خدات الاذن ودارت الاجراءات دالزيارة.. دخلات لعند هاجر..

هاجر: نهى 😭😭😭😭 شفتي اش وقع ليا..

نهى: شفت.. مكنتش كنتوقعها منك اهاجر.. عاوديلي شنو وقع .. وكيفاش حتى وصل بيك الامر تقتليه..

هاجر: 😨 نهى.. واش حتى نتي مغاتيقينيش.. انا مقتلتش.. اقسم بالله ما قتلت..

نهى: صافي احبيبة متبكيش.. وكيفاش مات.. واش الجنون مثلا قتلوه..

هاجر: نهى: علاش كتهضري هاكا.. انا اقسم بالله ماقتلتو.. اقسم بالله..

نهى: قتلتيه.. وفأوطيلي..

هاجر: مقتلتوش..

نهى: شفتي الاحساس بالظلم شحال خايب.. شفتي شحال خايب يتهموك كل الناس بأنك درتي شي حاجة ونتي مدرتيهاش... حسيتي دابا بعمر اللي كان بلاصتك.. مللي اتاهمتيه باللي قتل والديا وهو مادارهاش..

هاجر: اش كتقولي.. اش كتقصدي.. يعني نتي؟؟

نهى: نتي راكي ختي..هادا اقل واجب نديرو معاك.. انا رديتلك جزء بسيط من داكشي اللي درتي معايا..

هاجر: نهى خرجيني من هنا عفاك..

نهى: قوليلي اهاجر.. علاش درتي هاكا .. اش درت ليك انا.. مشفتي مني غير الخير..

هاجر: الخير الخير.. قتلتينا بخيرك.. ديما كتتبجحي بأنك البرينسيسة.. وانا الحثالة..ديما كتاخدي كلشي.. وانا كناخد الشايط.. حتى الراجل اللي بغيت ختارك نتي.. وعاملك بكرامة.. اما انا كان كيمسح فيا رجليه.. مكفاكش كاع هادشي اللي درتي فيا.. جاية تلصقيلي جريمة قتل دابا..

نهى: علاه مقتلتيش من قبل والديا.. وامير..

هاجر: انا مقتلت حد .. مقتلت حد..

نهى: وشكون من غيرك..

هاجر: سيري قلبي على اللي قتل والديك.. وشوفي شنو عندك معاه.. ماشي انا اللي موسخة وعندي ماضي.. حتى نتي.. بنت الزنقة..

نهى: سكتي انا اشرف منك..

هاجر: انا غانعاود ليهم كلشي.. نتي اللي باغا تورطيني نتي..

ناضت نهى وخلات هاجر كتغوت غا بوحدها.. وخرجات..

غالي: مادام واش نتي لاباس...

نهى: لاباس لاباس.. عرفتي فين ساكنين عائلة عمر..

غالي: عارف اجي نوصلك..

نهى: واخا..

وصل غالي نهى لدار عمر.. الدار اللي كانت متواضعة وغير ديال الكرا... دقات وقلبها كيضرب.. حل المصطفى الباب..

المصطفى: نهى!!!

نهى: لاباس عليك اعمي..

المصطفى: دخلي ابنتي.. تفضلي..

نهى: عمر كاين؟؟

المصطفى: كاين ..

دخلات نهى ولقات عمر والضاوية جالسين وتصدمو مللي شافو نهى.. ولكن عمر اكتر حيت ناض ووقف .. وبقا كيشوف فيها بدهشة..

نهى: عمر.. على سلامتك.. 😰 انا فرحانة بزاف حيت بانت براءتك..

بقا عمر ساكت ومجاوبش .. وحيد عينيه من على نهى وتقلب للجهة الاخرى.. شوية دخل لبيتو..

نهى: عمر😢

الضاوية: اش بغيتي ابنتي..

نهى: انا..

الضاوية: سمعيني ابنتي .. عمري كله وانا خدامة عندكم ومعمر والديك شكاو من شي تصرف خايب مني... من نهار تزاديتي.. عمري ما تدخلت فعلاقتكم نتي وعمر.. ولكن مللي نشوف ولدي الوحيد كيضيع قدام عيني .. بسبابك نتي.. مغنوقفش ساكتة.. خصوصا بعدما حفظ الله ورجعولي من جديد وفرحني بيه بعد شدة.. وبعدما كنت فقدت الامل.. متجيش عفاك .. تضيعيهلي من جديد.. انا كنتراجاك بعدي منه.. وحتى نتي دابا تزوجتي،. وكما انا شايفة قريب تديري الاولاد.. اللي انا متأكدة انك غادي تفهمي قصدي بعدما تولديهم... لا حنا من مستواك ولا نتي من مستوانا.. حتى لهنا وباراكة..

نهى: 😭..انا معنديش الذنب فهادشي كله.،

الضاوية: عفاك ابنتي.. سيري بجالك وكترجعيش مرة اخرى هنا..

نهى: 😭ممكن نهضر اخر مرة مع عمر؟؟ وبعدها تيقو بيا .. عمركم مغاتشوفو وجهي مرة اخرى..

الضاوية: دخلي للبيت.. هضري معاه .. وسيري بحالك..

نهى: واخا 😢

تأليف دودي العيساتي

الخطيئة- الحلقة التاسعة والاربعون

تأليف دودي العيساتي،.

دخلات نهى لغرفة عمر.. ولقاتو جالس وحاني راسو..

نهى: عمر 😰

عمر: علاش جاية انهى.. شنو باغية مني تاني...

نهى: عمر انا مقصدتش نجرحك..

عمر: تجرحيني!! انا دزت هاد المرحلة شحاال هادي..

نهى: عمر احنا ممكن،.

عمر: ممكن شنو.. ها ممكن شنو.. ممكن نرجعو الزمان للماضي ومتكسريش احلامي.. ومتمشيش بدم بارد مع امير وبكل وقاحة تجي تعرضيني لعرسك،. تدخليني الحبس ظلم.. نرجعو الماضي وتعطيني امل من جديد وفجأة .. تفيقيني وتصدميني فيك.. وتلوحيني للمرة الثانية فالعافيا.. وبكل سعادة تمشي تتزوجي اللي من مستواك.. وكما راني شايف قريب تولدي معاه.. سيري بحالك انهى.. وبلا متجي تمثلي عليا الحب.. احنا منتوالموش حتى للصحبة.. فما بالك لشي حاجة اكتر.. حبي ليك كان غلطة عمري.. وانا دفعت تمن الغلطة غالي بزاف..

نهى: عمر .. انا عارفة مزيان اش درت.. وعارفة انه صعب عليك تسامحني.. ولكن 😭 عقلتي على دوك اللحظات الحميمية اللي دازو بيناتنا.. انا عاقلة عليهم.. وغانبقى عاقلة عليهم حياتي كلها.. عرفتي علاش؟.. حيت خلاو فيا اثر.. غايبقا معايا حياتي كلها...

حطات يدها على كرشها..

نهى: انا متزوجت الا باش نستر راسي.. ومنتفضحش..

عمر: 😳

نهى: تقدر تقولي كيفاش كنت غانولد .. واب الولد مشدود فالحبس بالمؤبد.. شكون كنت غانقول للناس..

عمر: يعني.. الولد اللي فكرشك!!!

نهى: منك نتا 😭 ماشي من حاتم.. ولكن.. مادامك مابغيتيش تسامحني.. غادي نمشي...ومعمرك غادي تشوفنا مازال..

عمر: وعلاش مقلتيهاش من اللول..

نهى: عمر.. انا جيت للدار لقيتك كتهضر فالتلفون .. وكتقول مخاصش تحس بأي حاجة.. وفنفس النهار مات خويا وجدة.. الناس اللي كانو باقينلي فالدنيا.. كيفاش بغيتيني نفكر..

عمر: لو كلفتي راسك وسولتيني..فداك الساعة.. كنت غانقولك راني هضرت مع بابا.. وقلتلو متخليش ماما تحس بشي حاجة.. ولكن نتي حيت كتشكي فيا فكلشي.. متيقتينيش وعيطي للبوليس.. نتي اصلا من نهار جيت عندك للفيلا.. ونتي متايقاش فيا.. انا اللي وهبتليك عمري كله..

نهى: انا غانمشي اعمر..😭ونهار غاتحس باللي قادر تسمحلي.. اجي قلب عليا..

خرجات نهى وهي كتمسح دموعها.. ركبات فطوموبيلتها ومشات.. باتجاه beauty centre.. وصلات بقات مدة فالطوموبيل وهي كتبكي.. شوية خرجات.. وطلعات للمركز..

سارة: مادام نهى عاش من شافك.. اش هاد الغبور..

نهى: غا فالدنيا.. بغيت ندير سونا.. والمساج.. حاسة جسمي عيا..

سارة: المساج صعب شوية مع كرشك.. ولكن غانريحوك تفضلي معايا.. دخلات نهى للحمام.. ودارت السونا.. وجات سارة بدات كتدهن ليها ظهرها وهي جالسة..

سارة: داك المرة مللي كان فخباري تزوجتي.. كان غايبقى فيا الحال حيت معرضتيش عليا.. كاع معرضتي علينا.. علاش

نهى: مدرتش العرس.. غا العدول اللي جا وصاف..

سارة: الله يسرليك اختي .. اللي داز عليك ماشي صعيب.. الله يكون فعونك

نهى: اميين...

سارة: وهادا اللي تزوجتيه شكون.. واش معروف؟..

نهى: سميتو حاتم.. رجل اعمال .. كان شريك امير الله يرحمه..

سارة: الله يرحمه.. وكيتهلا فيك..

نهى: بزاف.. ولد الناس ومحترم.

سارة: شوقتيني باش نشوفو..

نهى: 😪

سارة: مادام واش نتي لاباس..

نهى: حاسة بدوخة.. انا غانوض باراكة عليا.. باينة السخونية دوخاتني

سارة: واخا بشوية عليك..

خرجات نهى وجلسات على كرسي باش تصاوب ليها البنت شعرها.. وجات وحدة تصاوب ليها ظفار رجليها ويديها... وبقات كتهضر مع سارة على احوال المركز..

نهى: عارفة اسارة باللي مخلية الحمل ديال السونطر عليك.. ولكن عارفة ان ماما الله يرحمها كانت معولة عليك فكلشي.. وانك قد المسؤلية ..

سارة: متقوليش هاد الهضرة.. ماماك كانت ماما حتى انا.. عمري ننسى خيرها عليا..

نهى: الله يجازيك اختي..

تأليف دودي العيساتي

الخطيئة- الحلقة الخمسون..

تأليف دودي العيساتي

بقات نهى فالسونطر كتقاد راسها.. حتى صونا تلفونها..

حاتم: حياتي فينك..

نهى: حبيبي لاباس عليك.. انا راني فالسونطر دالتجميل ديال ماما.. كنقاد راسي..

حاتم: نتي زوينة.. متحتاجيش التجميل ههه

نهى: ههه يخليك ليا...

حاتم: انا غاندوز عندك باش نمشيو نتغداو فشي بلاصة رومانسية .. واخا ؟

نهى: واخا.. ولكن غانتطعل عليك.. مغنكمل من هنا شي نص ساعة تقريبا..

حاتم: واخا احبيبة خودي راحتك..

بقات نهى كيصاوبولها البنات وحداها سارة كيهضرو .. حتى جات واحد البنت..

البنت: مادام نهى كاين واحد السيد كيستناك.. كيقول ان سميتو حاتم..

نهى: هاداك راجلي.. قولي يستناني شوية..

البنت: واخا امدام..

سارة: خاصني نشوفو هههه غانطل عليه..

نهى: واخلي نعرفك عليك هه مالك على فضولك...

سارة: واغي نطل..

طلات سارة على حاتم.. وبقات كتشوف فيه بزاااف .. ورجعات.. جلسات مع نهى..

سارة: نهى.. فين تعرفتي عليه..

نهى: كان شريك امير فالشركة..

سارة: مم

نهى: هانا ساليت.. اجي نعرفك عليه..

سارة: بلاش مرة اخرى حسن .. سيري راك تعطلتي عليه.. واصلا تفكرت شي حاجة مهمة خاص نمشي نديرها..

نهى: نتي غريبة والله ههه عاد كنتي ملهوفة هه يالله نخليك دابا.. تهلاي

سارة: بالسلامة احبيبة ..

نزلات نهى غا شافها حاتم ناضت من بلاصتو ضاحك ومشا عندها عنقها وباسها

حاتم: اميرتي الزويونة.. زدتي زيانيتي

نهى: هههه الله يخليك ليا..

مشاو من السونطر باتجاه مطعم فخم نزلات نهى وحاتم شد فيدها... جلسو وبقاو كيهضرو... شوية سرحات نهى وبقات كتفكر فعمر.. واش غايرجع ليها ولا مغاينساش جروحه اللي كانت كلها بسبب نهى.. والجرح الاكبر اللي كان زواجها..

حاتم: فاش سرحتي احياتي..

نهى: فهاجر.. 😔 تشدات فجريمة قتل..

حاتم: فخباري.. قالهالي رشاد..

نهى: مفهمتش كيفاش هاجر تقدر تقتل.. واشنو اللي دار ليها داك الحيوان باش نتاقمات منو..

حاتم: احم.. حتى واحد معارف اشنو اللي كيضور فعقل لاخور..

نهى: بالصح.. حتى واحد معارف ..

بقاو كياكلو .. شوية ناضو بقاو كيضورو بالطوموبيل حتى رجعو للفيلا..

اليوم التالي فاقت فيه نهى .. وبقات كتشوف.. وكتفكر.. عمر مجاش عندي ولا سول فيا... يعني مبقاش باغيني.. لو كان جا وقالي غانساو كلشي.. مستعدة ننسى كلشي.. ونبدا من جديد ..اااه يا عمر.. علاش .. علاااش 😔

دقات الخدامة فالبيت على نهى..

الخدامة: لالة .. كتسول فيك واحد السيدة سميتها سارة..

نهى: واخا غانبدل حوايجي وغاننزل ..

بدلات نهى حوايجها ونزلات عند سارة لقاتها جالسة وكتشرب القهوة...

نهى: سارة.. لاباس عليك

سارة: الحمد لله احبيبة نتي لاباس عليك؟

نهى: الحمد لله..

بقات سارة ساكتة .. ونهى كتستنى تهضر..

نهى: مالك اسارة.. اشواقع.. واش جاية تسكتي ولا؟

سارة: الصراحة معرفتش كيفاش غانقولك هاد الهضرة.. فين راجلك؟

نهى: مشا للخدمة..

سارة: مزيان.. احسن باش نبقاو على راحتنا..

نهى: هضري اش واقع..

سارة: الصراحة.. واحد النهار فأيامات مادام مونيا .. كنا فالصالون .. حتى جا واحد السيد وسول عليها ..مللي خرجات عندو .. تفاجئات ودخلاتو للبيرو.. بقاو كيهضرو وسدو عليهم... بقاو كيهضرو شوية ارتفع صوتهم بجوج.. خرج وبقا كيغوت ويقوليها غاندمرك نتي وعائلتك.. غاندمرك.. اما هي بقات كتقوليه خرج برا ودير اللي قديتي عليه..،

نهى: شكون هادا ..

سارة: هاد السيد هواا.. راجلك حاتم القاسمي..

نهى: 😳

تأليف دودي العيساتي