دار المتعة 1-2-3-4-5

دار المتعة-الحلقة الاولى
تأليف دودي العيساتي
هكذا ابدأ الكلمات .. بالانين من القلب.. لقسوة الحياة.. لظلم الزمان.. وغدر الايام.. تتلاشى الاحلام.. لتقتل الاماني.. أصارع الاوهام.. في ظلمة الليالي.. وأبقى وحيدة .. نعم وحيدة .. أرسم الخيال على ضوء القمر.. وأسأل؟ أين الأمل ؟.. لأبدأ من جديد .. الحب، المستقبل، الاحلام.. وفجأة!! يصيبني الكدر وتتبخر الافكار.. وتصبح كالسراب وأعود للانين .. لأبقى وحيدة بين جدران الظلام..
الساعة 7:00 صباح.. بحال كل يوم غادية للخدمة.. انا اكرام..بنت بسيطة بزاف واحلامي ابسط مني.. خدامة فمعمل للنسيج..داخلة انا وبزاف دالبنات بحالي.. كلهم احلامهم ابسط منهم.. عيالات وبنات شابات.. كل وحدة حدا ماكينة الخياطة ديالها.. كلها ملهية فراسها.. حتى كيدخل احمد..الغيسبونصابل.. اللي كيعلي راسو وكيراقب اي وحدة شافها وداز من حداها حتى كيوصل عندي .. صبحنا ع الملك لله..
احمد: صباح الخير اكرام .. لاباس شوية؟
اكرام: لاباس الحمد لله..
احمد: فالبوز اجي تتغداي معايا.. جبت شي دجاج .. صاوباتولي الوليدة..😁
اكرام: شكرا .. غيستناني خطيبي جلال..
احمد: احم .. خدمي مالك ثقيلة .. اشهاد الخدمة الناقصة..
اكرام: بفف الصباحة لله..
احمد: قلتي شي حاجة؟
اكرام: قلت غادي نصاوب خدمتي اشاف..
اسطوانة كتتعاود كل نهار.. معرفتش اش كيبغي.. اهم شيء واللي مصبرني فهاد الخدمة.. اولا خطيبي جلال اللي خدام فهاد المعمل حتى هو .. ولكن فسرفيس اخور.. واللي بغيت نعاونو على الزمان باش نتزوجو .. وثانيا حيت انا عندي راجل ام .. مكيجيبلينا للدار انا واختي حتى كوميرة.. وخويا اللي فالدار مكيقابل غا يكمي لحشيش .. والسكرة.. كنهرب يعني من الدار .. حيت عييت وطاب جسمي من ضربو ومن حكرتو ليا ولختي.. هادشي كله خلاني نتحمل اللي بحال احمد فالخدمة .. باش نهرب من المشاكل.. ونتهنى وندير داري حتى انا.. ولا نقول غا بيت.. انا قابلة بيه.. المهم نهرب.. وننعس بلا صداع بلا خوف .. بلا مشاكيل..كيدوز نهاري فالروتين.. حتى يوصل وقت الغدا.. ونشوفو .. ديك الساعة تحلالي الدنيا..ونضحك.. مللي كيجي عندي.. ويستناني فالباب.. باش نمشيو ناكلو فشي كيوصك قريب..
جلال: توحشتك..
اكرام: حتى انا ... تمشى دغيا باش نتغداو ونرجعو فالوقت..
جلال: واخا..
بحال كل يوم.. كنمشيو انا وجلال نتغداو.. ونبنيو احلامناا وحنا كنهضرو على شنو خاصنا نوجدو..
جلال: لقيت دار ديال الكرا.. قريبة من الخدمة.، فيها بيت وكوزينة ،، وصالون صغير..1500 درهم.. غالية ياك..
اكرام: اه غالية.. واش مكينش شي دار فيها غا بيت وكوزينة.. انا مباغاش بزاف.. غانصبر معاك حتى يحن الله..
جلال: نقلب.. مكرهتش نتزوجو ليوما قبل غدا.، ولكن هانتي شايفة الظروف.. شفتي جواد ومرتو... شراو دار.. حسن من الكرا..
اكرام: فين لقاو الفلوس..
جلال: دارو كريدي على حساب المعمل.. وهاهما هانين..
اكرام: سعداتهم..
جلال: شنو بانلك نديرو كريدي حتا حنا..
اكرام: انا شايفة نجمعو الفلوس باش نتزوجو بعدا .. وفاللول نسكنو غا مع ماماك.. مابغيت لا عرس لا حوايج لا دهاز.. ومن تما نديرو كريدي مللي نستقرو.،
جلال: واخا.. نسكنو مع مي.. واخا خوتي كل واحد شاد بيت هو ومرتو.. ولكن نديبانيو.. مرة مرة نمشيو عند امك..
اكرام: امي بلاش.. راك عارف راجل امي.. كنتحمل هضرتو دابا بزز..
جلال: ديك الساعة نكون معاك انا.. مالو يقدر يقوليك شي حاجة ولا يهضر عندك وانا كاين
اكرام: الله يخليك ليا.. 😚
كيسالي البوز .. بحال ديما.. وكنرجع للخدمة.. وانا المورال ديالي طالع.. بعدما كنت مع جلال.. الله يخليه ليا.. باراكة عليا غا هو.. وان ربي جازاني بيه .. واخا تمحنت فحياتي بزاف.. وكليت العصا وانا معندي حتى ذنب.. الا اني مرتاحة معاه .. وحاسة ان ربي غايعوضني خير منو.. سالات الخدمة.. وحان الوقت نخرجو.. كالعادة كنلقا جلال كيستناني فالباب.. باش يوصلني للدار..
اكرام: جلال.. شحال جمعتي دالفلوس دابا..
جلال: محسبتش احبيبة.. فلوسي مع فلوسك معرفتش شحال.. كنخبهم ديريكت
اكرام: ياك كتحطهم فمكان امن.. عندك يهزهوملك شي حد..
جلال: متخافيش.. راهم فالحفظ والصون
اكرام: مزيان راك عارف انا منقدرش نحطهم عندي.. حيت منأمنش يهزهم ليا راجل امي.. وحتى خويا..
جلال: متخافيش.. انا غانهنيك منهم كلهم.. مللي نتزوجو..
اكرام: املي كله فيك ومعاك.. كنبغيك بزاف..
جلال: يالله دخلي لداركم دغيا قبل منتحرش بيك.. 😜
اكرام: ههه بالسلامة .. 😘
كندخل للدار حتى كيوقف عليا ابو العُريف.. راجل امي علال..
علال: علاش تعطلتي..
اكرام: متعطلتش..
علال: وصلك داك خينة عاود .. باغا تشوهينا فالحومة..
اكرام: هاداك خطيبي والحومة كاملة عارفة هادشي.. وزايدون هو غا وصلني مدرنا حتى حاجة خايبة ..
علال: خاصكم التربية من جديد ..
خليتو كيهضر كالعادة ودخلت لبيتي.. لقيت ختي كتحفظ.. عندها الباك هاد العام... مبغيتش نخليها تخدم واخا الزن المتواصل ديال امي وراجلها.. وزيد عليهم خويا،.. انا بغيتها تقرا،، ومديرش بحالي.. مرة مرة كناخد من جلال فلوسي باش نشريليها ما تحتاجو...
شيماء: ختي جيتي..
اكرام: جيت .. وتلاقاني رجل امك يضيعلي ميزاجي.. مفهمتش انا علاش تزوجاتو امك.. على زينو..
شيماء: بردي بردي.. عاوديلي كيداز نهارك..
اكرام: غانعاودلك 😃

دار المتعة- الحلقة الثانية
تأليف دودي العيساتي..
ايامي تقريبا متشابهة . فيها السيء كتر من الجميل .. امي من نهار تزوجات ماهتمات بيا.. بالعكس.. كتقول باللي ولادة البنات مكتجيب غا الصداع والنحس...الولد هو اللي شيفاه جايب الصداع وديما مدابز فالحومة،.. ديما كناكل منو العصا باش ياخد مني الفلوس.. دابا بعدما وليت كنخبعهم عند جلال.. ولا كيجي يقلب.. مكيلقا غا 50 ولا 100 درهم هي الكتيرة.. كيشبعني عصا .. وليت فالمعمل دايرا التزام لجلال باش يتصرف ففلوسي وفخلصتي .. باش مياخدهمش ليا خويا.. ها هو جا بحال الحية ..
محسن: اجي نتيا.. علاش تعطلتي..
اكرام: متعطلتش..
ضربني بالبونية لظهري..
محسن: دوي فين كنتي.. كتخسري فلوسك مع داك المعفون.. جبدي اري الفلوس..
اكرام: معنديش 😭
محسن: جبدي ولا نخشي فيك هاد الجنوي نخرجو من ظهرك.. جبدي
اكرام: حرام عليك..
محسن: اري ولا ندبح مك هنا..
كان كيضرب ويسب باقبح الالفاظ.. حتى جبدت 100 درهم كنت مخبياها .. خداها وعطاني بركلة زلزلاتلي الضلوع.. جسمي طاب بقوة مكيضرب.. مكيعياش.. ديما هاكا كيمسيني بتفرشيخة..عييت بزاف.. ومبقيتش قادرة نتحمل كتر
شيماء: 😭 صبري اختي دابا تتزوجي نتي وجلال وتتهناو من هاد الصداع.،
اكرام: عييت.. حاسة باللي مبقات عندي صحة للدنيا.. فين غانمشي مازال.. غانقول لجلال يتزوجني.. باش نخرج من هاد الدار.. عييت منها.. مستعدة نبات معاه فالزنقة..ومنزيد هنا نهار..
شيماء: صافي اختي عفاك،. نعسي باش ترتاحي...
النعاس .. المهرب الوحيد ديال التعساء.. دايما اللي تعيس كيقولك بغا ينعس .. وبزاف العلماء قالو باللي اللي كينعس بزاف عندو اكتئاب.. انا كننعس ولا نقول كندير راسي ناعسة.. حيت كنبكي فصمت.. وكنحلم يسالي عذابي شي نهار.. من صغري وانا فهاد الحال.. حتى قرايتي مكملتهاش واخا كنت متفوقة.. سكتي اكرام سكتي.. نعسي وسدي على جروحك.. حيت شي نهار غادي تفيقي وتلقايها مكيناش.. حافظي على شوية دالطاقة لديك الايام.. قلبي اللي ولى مغموم وخايف.. لا الدنيا تتقلب عليا والشتا تبدا تصب ولبرق والرعد .. خايفة نقضي حياتي هاكا.. خايفة تكون حياتي مع جلال صعيبة..
كالعادة كيدوز نهاري.. ولكن هاد المرة قررت اني نسالي عدابي.. ونطلب من جلال يديرلي العقد.. ونتزوجو.. نخرج من هاد الدار.. مبغيتش العرس ولا دوك الشكليات.. بغيت غا نرتاح ..
فقت الصباح وشفت فالمرايا .. بانلي جسمي كله زرق تقريبا.. والاثار ديال الضرب كيحرق فكل بلاصة من جسمي.. لبست حوايجي على اساس كل نهار نسد على الضربات ونسكت .. وننسى او نتناسى.. كلشي غادي يفوت... كلشي غادي يفوت.. غادية وكنواعد راسي بهادشي.. انا غادي ننسى كلشي وغادي نبدا مع جلال من جديد.. احن يد تحطات عليا هي ديالو.. املي فيه ان عذابي يسالي .. وننسى موراه كلشي .. كالعادة مشيت نخدم ودوزت نهاري فالخدمة .. فوقت الغدا ملقيتش جلال كيستناني.. حتى الليل.. مللي خرجنا.. عاد بانلي كيستناني..
اكرام: فين كنتي.. خليتيني فالغدا بوحدي..
جلال: حبيبة راكي عارفة .. كنقلب على الدار.. مشيت مع واحد صاحبي وراني واحد الدار..
اكرام: ايوا..
جلال: معجبتنيش.. صغيرة بزاف..
اكرام: وعلاش مشديتيهاش اجلال.. مهما كانت راها ارحم من العيشة مع عائلتي.. انا واخا تكون خربة ديال الكلاب.. ننعس فيها وتبانلي جنة.،
جلال: مالك ليوما اكرام.. ماشي من عادتك تهضري هاكا..
اكرام: عييت اجلال 😭 عييت ..
جلال: مالكي احبيبة.. متبكيش .. مالكي علاش عييتي..
اكرام: عييت من ضرب اخويا ليا كل نهار.. ومن هضرة راجل امي وتسلطه.. ومن امي نفسها عييت.. مكرهتش نعيش معاك خلاص..
جلال: قريب احبيبة غاترتاحي.. كنواعدك.،
اكرام: مكرهتش 😖
تأليف دودي العيساتي

دار المتعة- الحلقة الثالثة
تأليف دودي العيساتي..
دازت سيمانة.. وانا شادة فيها راسي بزز .. نفسيتي تدمرات بسبب عائلتي .. امي مسايقة ليا خبار.. وشايفاني عالة.. خصوصا بعدما قطعت عليها الصرف.. راجلها كذلك.. خويا داير حقو ..واحد النهار مشيت للخدمة كالعادة.. دوزت فيه نهاري.. جا وقت الغدا ستنيت جلال يجي .. مبانليش.. رجعت للخدمة.. مللي خرجنا ستنيتو مجاش.. اكيد كيقلب كالعادة على دار.. مشيت للدار.. بقيت كنصونيلو تلفونو طافي.. بقا فيا الستريس من جيهتو.. ياكما واقعة ليه شي حاجة.. صليت صلاتي ونعست.. الصباح فقت بقيت كنصوني والو.. مشيت للخدمة.. دوزت الوقت بزز.. وصلات وقت الغدا والناس ماشيين يتغداو انا مشيت للسرفيس ديال الصطوك اللي خدام فيه هو.. بقيت كنشوف حتى بانلي الغيصلونصابل ديالهم..
اكرام: سمحلي نسولك .. واش مبانليكش جلال اعمي..
السيد: جلال مجاش هادي يوماين..
اكرام: كيفاش 😳 ياكما واقعة ليه شي حاجة..
السيد: الى دازت تلاتة ايام ومبانش ومجابش مبرر غيابو غادي يشطبو على سميتو من الشركة
اكرام: لا لا غايجي اكيد مريض.. انا غادي نجيب ليكم المبرر.. عفاك اعمي صبر ومديرش شي اجراء.. هو عمر ما تغيب ..
السيد: ايوا سربي علميه ابنتي القوانين هما هادو..
اكرام: يا ربي اش واقع ليه.. غادي نمشي للدار عائلتو اكيد عندهم خبر عليه..
رجعت للخدمة بلا منتغدا حيت كان سالا البوز.. جلست على نار.. وعقلي ماشي معايا وحتى الخدمة مدرتهاش مكادة.. وصلت الوقت دالخروج.. نضت دغيا وشديتها بجرية حتال دارهم.. بقيت كندق خرجات عندي ختو غا شافتني ضحكات،. ماشي ضحكة عادية وانما ضحكة وحدة شمتانة .. وكتستنى ردة فعلك..
الاخت: جيتي 😀
اكرام : فين هو جلال..
خرجو ديك الساعة كلهم فدارهم..وبقاو يشوفو فيا ويضحكو.. مفهمت والو.. عاودت سولت..
اكرام: فيناهو جلال..
خوه: جلال طار.. حرك لاسبانيا..
اكرام: كيفاش حرك.. 😥
خوه: حرك هي حرك.. جمع حوايجو وفلوسو ومشا.. ومتخافيش راه وصل تما كتستناه واحد الكاورية هي ساكن معاها..
كنشوف فيهم كيضحكو وكيشوفو فيا وشمتاتين.. وانا ديك الساعة مفهمت والو ومقدرتش نتحمل .. صدمة كبيرة.. بدون مننطق حتى كلمة مشيت ووجهي مصدوم وماقدرتش نهضر.. حرك!!! وانا.. هادي هي قريب يسالي عدابك.. وانا اللي كنحلم .. وكنطلب منو يسكني فأي خربة.. ونصبر معاه.. واش طج مني.. بقوة النواح اللي كنقيل نوحو عليه.. واش ماشي انا اللي كان ناوي يبني معاها احلامو.. واش كنخبي معاه فلوسي .. باش نكريو دار ونتزوجو ونتعاون معاه على حياتنا.. صدقت كنجمعلو باش يحرك.. واش كنحلم.. واش كابوس هادا،، لقيت راسي قدام دارنا.. شفت فيها .. رجعت من جديد .. واش مازال غانبقى هنا.. ومغاديش نتخلص من هاد القهرة.، غانبقا فيها ديما.. واش بقا فيك الحال حيت جلال باعك.. ولا حيت احلامك تبخرات وتدمرات فغمضة عين.. احلام!!! اينا احلام،، واش هادوك احلام.، واش يتسماو احلام.. واش انك تبغي تعيشي فخم كيتسمى حلم..؟ واش كلشي ضاع وغانبقى هنا حتى نموت بالقهرة ولا بالضرب 😭..
دخلت للدار وانا مقادراش نوقف على رجلي.. لقيت راجل امي كيهضر كالعادة ولكن هاد المرة مقدرتش نسمعو.. دخلت للبيت تلقاتني شيماء..
شيماء: ختي مالكي ..
اكرام: جلال 😪
شيماء: مالو..
اكرام: حرك
شيماء: وفلوسك؟؟😨
اكرام: حرك بيهم 😭
شيماء : ولد الحرام 😠غانمشيو لعائلتو نقولوهاليهم
اكرام: هادشي اللي همك؟؟ الفلوس.. قلبي اللي تقهر مبقاش فيك 😭
شيماء: صافي احبيبة عفاك.. والله ميستاهلك..
اكرام: انا شكون يستاهلني.. 😭شكون انا اصلا.. الا جلال اللي بحالي مرضاش بيا .. ومشا الخاريج يقلب على اللي تليق بيه.. شكون غايستاهلني انا.. شكون هادا اللي تولد فالنهار الكحل.. انا اكتشفت راسي مكنسوى حتى بصلة.. انا عيانة بزااف اختي.. تقهرت بزاف.. كيبقا فيا راسي.. مللي كنحلم بحوايج .. المفروض انها تكون حقوق ليا.. حتى جلال .. اللي بغيتو.. وشفت فيه الحنان اللي افقدتو حياتي كلها.. مشا.. مشا ومكلفش راسو حتى يودعني .. تأليف دودي العيساتي

دار المتعة- الحلقة الرابعة
تأليف دودي العيساتي
تكمشت فبلاصتي.. وعينيا طابو بالدموع.. دوزت الليلة هكاك.. والصدمة متمكنة مني.. اه الصدمة .. صحيح انه ماشي غريب على شي وحدة بحالي يوقع فيها هكا.. مولفتش احلامي كتتحقق ديما وعايشة الرفه باش نتفاجأ دابا.. ولكن هاد المرة تقهرت.. حيت كان عندي امل بسييط.. هو اللي خلاني نشد فيه ونتيق باللي ممكن حياتي تهدا وصاف .. مكنتش طامعة فالموحال.. طالبة غير الهنا.. واني نسالي من هاد الصداع ..
دوزت ليلة كحلة.. فقت ولا نقول منعستش كاع.. وصل وقت الخدمة.. بدلت حوايجي مكليت والو.. مشيت للخدمة وانا عينيا منفوخين.. ومكنهضر مع حتى واحد.. كلشي كيشوف فيا وكيستغرب مالي.. انا بوحدي اللي عارفة مالي.. وشنو اللي كيقهرني لداخل.. كلشي تبدل عليا.. الحماس اللي كان فيا وانا كنخدم باش نكمل دغيا ونشوفو .، مبقاش .. حتى الضحكة الدي كنت كنوزعها عليهم ملي كنت كنرجع بعد لقاءي معاه.. حتى هي مبقاتش.. ولى كلشي كيبانلي كحل.. سالات الخدمة ومشيت.. مكنتش موالفة اني نتمشى بوحدي حتى للدار.. كان هو يوصلني ديما .. كلشي تبدل فغمضة عين.. كلشي مشا وتغير.. دخلت للدار لقيت راجل مي جالس وكيضحك
علال: فيناهو اللي كان ديما كيوصلك..
الله يا ربي حتى هو ساق الخبار.. حتى هو غايشمت فيا دابا..
علال: جاوبي امولات الفهامات.. ياك قلتي الحومة كلها عارفاه خطيبك.. ها الحومة كلها عرفات باللي طج منك وحرك.. فالحة غا تجيبيلنا الشوهة..
مقدرتش نجاوبو.. اش غانقول وهو عندو الحق يقول اللي بغا دابا.. حيت اللي كنت كنتفاخر بيه قدامهم وباللي غايحميني منهم مشا وطج كما قال..
علال: دوي.. كلشي صابح اليوما كيهضر عليك.. وعلينا حيت معرفناش نربيوك.. سمعيني مزيان.. من هنا لفوق يا تعاوني على مصروف الدار.. يا تجلسي فالدار.. الى كنتي غاتخرجي باش تشوهينا بلاش..
حنيت راسي ومقدرتش ننطق حتى كلمة.. اللي كان كيقويني مشا..لمن نجمع الفلوس دابا.. خليني هنا .. نسكتهم بيها عليا على الاقل..
دخلت لبيتي لقيت شيماء كتحفظ.. مقدرتش نجلس كالعادة ونهضر معاها ونسولها على قرايتها.. حياتي رجعات للروتين القديم ديالها.. ولكن هاد المرة.. بلا جلال.. بلا مناكل تخشيت فبلاصتي..
شيماء: واش مغاتاكلي والو ليوما عاود..
اكرام: وعلاش غاناكل.. علاش..
شيماء: على قبلك اختي.. حتى واحد مينفعك .. صحتك هي المهمة..
خليتها كتهضر ودخلت فدوامة التفكير واليأس من جديد.. الوجه الاخر للحياة هو هادا.. وجه البؤس .. وجه الاحلام اللي مقدرناش نحقوهم رغم بساطتهم.. انا فصغري كانت احلامي كبر من هادي.. فصغري كنت كنشوف هاد العمر وهاد السنين حاجة اخرى.. كنت كنشوف راسي فيهم مختلفة.. كنت كنتمنى نخرج شاعرة.. هه اه شاعرة .. كنت كنبقى نكتب فالقصائد.. على كلشي وكانت كتقولي الاستاذة باللي نتي غاتكوني شاعرة ممتازة.. اجي تشوفي استاذة كيوليت.. مبقيتش كنحلم.. وليت كنخاف نحلم.. حتى قرايتي مكملتهاش.. والفشل تغلغل حياتي .. فكلشي فالقراية فالعائلة فالحب...
بحال كل يوم منعستش ونضت صليت وبدلت حوايجي وشربت قهوة كحلة.. باش منطيحش حيت القوة ديالي بديت نحس بيها نقصت.. مشيت لخدمتي .. دوزت فيها الصباح واحمد غادي جاي عليا.. مللي وصل وقت البوز.. جا كيجري عندي.. جا يتشمت حتى هو فيا 😔
حتى فاجأني ..
احمد: اكرام.. واش نتي لاباس؟
اكرام: الحمد لله
احمد: تتغداي معايا.. ؟
اكرام: 😕واخا
فاجأتو حتى انا مللي وافقت .. مشيت معاه للبيرو ديالو .. وجلست جبد غداه اللي كتوجدولو امه.. احمد راجل فالاربعينات عازب عايش مع امه.. بدا كيهضر بلباقة غير معهودة.. مالو حتى هو راجل.. شنو المانع الى وافقت نتزوجو ونخرج من الجحيم ديال دارنا.. على الاقل هو كيبغيني ومعمرو مل من انه يتلاطف معايا.. بدا ياكل ويهضر وفرحان.. واخا باينة انه ولد مو.. ولكن ماعليش.. غادي نتعايش مع الوضع كما كان .. احسن من الضرب والاهانات ديال دارنا..بدا يهضر وهو كياكل والماكلة كتطيح من فمو.. غيفلني.. واش هادا اللي غانكمل معاه حياتي.. نضت قلتلو غانرجع للخدمة.. بقا كيطلب مني نجلس ولكن مبغيتش.. رجعت لخدمتي.. وجلست فيها... علاش اربي كتحطني فهاد المواقف

دار المتعة- الحلقة الخامسة
تأليف دودي العيساتي ..
اه لو علمت انك بي لاعب.. لاسلطن شياطين الجن والانس عليك يا كادب .. وأجهل شمسك قبل شروقها تغيب.. وأسود لون ايامك يا كذوب.. وسأقسم بجلال الله المجيب.. اني سأجعلك بالشك مضطرب.. تمشي ظليلا والدروب.. لتحس انك في ارضك غريب.. لا ترى الدنيا الا هموما وكروب.. وترى الموت على قارعة الطريق قريب.. فيترائى لك الحب معاص وذنوب.. فتوقن انه بالخيانة مشوب.. حينها سأتأكد أني يا لعوب.. قد علمتك كيف تحترم القلوب..
الاكتئاب خدا بلاصة من قلبي مبقيت كنضحك ولا حتى نبكي.. ديما فشلانة وحتى الصحابات مدايراهمش.. حتى انا مبقيت عاونت راسي نخرجها من هاد المحنة.. بحال الى غضبانة على الحياة .. كاعية على الوضعية.. وكننتقم من نفسي بأني نحرمها من الاستمتاع بأي حاجة.. كلشي باقي هو هو.. خويا اللي كيجي يضرب ويركل.. راجل امي اللي كيقيل يلوح الهضرة ومكيفوتش فرصة باش يضحك ويتشمت فأن جلال مشا وخلاني.. امي نفسها اللي ديما كتعاير وتسب وتلعن النهار اللي تزادينا فيه.. شفتي اجلال فين وصلتيني.. يا ريتك خليتيني فداكشي اللي كنت فيه .. يا ريتك خليتيني منحلمش ونعلق راسي من نهار اللول ونرضى بحياتي .. داز داك الشهر .. وصل وقت الخلاص.. اللي كنت كتخلي جلال هو اللي يهز ليا خلصتي.. ما اجملها من خلصة.. 1800 درهم.. شديت التور ديالي.. وكنستنى ندخل.. حتى وصل الدور ديالي .. شاف فيا المحاسب بعدما عطيتو سميتي ..
المحاسب: جلسي .. حتى نكمل مع كلشي.. نتي خاصني نهضر معاك
خلعني معرفتش فاش غايهضر معايا.. بدات بزاف السيناريوات كتضور فعقلي.. كلها خايبة الا انها مكانتش اخيب من السيناريو اللي كان كيستناني.. مللي كمل مع كلشي شاف فيا وقال..
المحاسب: كنتي دايرا التزام لواحد السيد سميتو جلال باش يتصرف فأمورك المالية..
اكرام : اه..
المحاسب: وفيناهو
اكرام: 😞 حرك..
المحاسب: حرك 😒.. اذا على حسب الوثائق .. نتي اللي غاتتحملي المسؤولية..
اكرام: مسؤولية!؟
المحاسب: اه .. كتر من تلاتة شهور خدا قرض من الشركة ديال اربعة دالمليون .. بسميتك نتي.. وكل شهر الخلصة ديالك غاتغطي القرض.. حتى تكمليه.. دابا عاد يالله خلصتي شهرين وصاف.. اكرام: اش كتقول 😳 انا مخديت قرض..
المحاسب: بموجب هاد الالتزام.. نتي خديتيه.. وايلا مخلصتيهش فشهرين غاتعتابري مختلسة لهاد الفلوس.. وغادي تمشي للحبس..
اكرام: الحبس 😭لا والله مخديت شي فلوس والله
المحاسب: سمعي ابنتي..نتي باينة فيك نية وتلعب بيك .. مول الشيء مغايفهمش هادشي.. خصوصا ان اربعة مليون ماشي قليلة..حاولي تضبريها وترجعيها للشركة.. باش ميدعيوكش وتدخلي للحبس.. تضيعي حياتك ديك الساعة على قبل اربعة دالمليون..
اكرام: منين غانجيبها.. 😭😭
المحاسب: ديك الساعة سيري لمول الشركة تفاهمي معاه.. وقوليليه يصبر عليك تخلصيها شوية بشوية.. من الخلصة ديالك.. ولا تديري معاه التزام اخور.. ولوا اني مكنصحكش بيه.. سيري عندو راه ولد الناس.. وغايسمعك.. انا غاناخدلك موعد معاه ..
اكرام: عفاك اعمي.. هضرلي معاه.. 😭 انا معرفتش اش هاد المصائب كتطيح عليا.. اش درت فحياتي..
خرجت من عندو وانا مهازانيش رجليا.. واش هاكا اجلال.. مكفاكش انك تخليتي عليا وكسرتي احلامي.. بغيتي تدخلني الحبس.. وتشمت فيا وتضحك عليا العديان.. علاش اش درت ليك.. واش هادشي كله حيت بغيتك.. وتمنيت نعيش معاك بعيد على الصداع والمشاكيل.. هادا يكون مصيري .. ندخل الحبس 😭 علاش اربي علاش.. انا مطلبتش شي حاجة كبيرة .. من دون اني نكون مرتاحة..
مشيت للدار.. دخلت سمعت الاسطوانة.. وبقيت كنشوف.. واش هادو اللي غايوقفو معايا.. ولا غادي يتبراو مني الى دخلت الحبس على الفلوس.. كيستناولي السبة اصلا..