الجزء 59
شحال زوين تكون مع عائلتك .. ولاد خويا زوينين بزاف .. مكرهتش حتى انا لوكنت ولدت مع ياقوت .. ولات مرض مزمن بالنسبة ليا .. مرضت وكنشوفها فكل شيء ..
- كرم .. اكرم .. فين راكم .. خليو عمكم يرتاح شوية ونتوما معدبينه ..
هادي كانت مرت خويا جات تعيط على ولادها ..
- خليهم .. انا مرتاح بزاف معاهم ..
- خويا ليث .. معرفتيش شحال راك عزيز عليهم حتى من قبل ما يشوفوك .. ديما كان يعاود ليهم امير عليك .. هو كان كيحس بيك .. وكان كيقلب عليك بزاف ..
- انا مكنتش عارف عائلتي .. بمجرد معرفت الحقيقة جيت قلبت عليكم مباشرة ..
- عرفتي حتى والديا فرحو بزاف حيت تجمعتي مع عائلتك ومكرهوش يتعرفو عليك ..
- كيشرفني نتعرف عليهم حتى انا .. واش هما من هنا ؟؟ واش قراب ..
- هما اصولهم من هنا ولكن عايشين فكازا .. حيت بابا عندو تما شركات مقابلهم ..
تفاجأت بهضرتها .. يعني هي من عائلة لاباس عليها بزاف .. كيفاش حتى قبلت تتزوج بخويا اللي من عائلة فقيرة ..
- فاش كتفكر ..
- مديريهاش مني قلة الصواب ولكن .. نتي باباك عندو شركات فكازا ..
- تماما ..
- يعني نتي بنت عائلة غنية ..
- صحيح ..
- كيفاش اذا حتى تزوجتي بأمير اللي كما كنشوف معندكش مشكل تجي كل مرة لهاد البلاصة اللي ديال انسان فقير بزاف .. كيفاش عائلتك وافقو يزوجوك بيه ونتوما بيناتكم هاد الفرق الكبير فالمستوى الاجتماعي ..
- ههه كلشي كيستغربو طبعا ولكن انا كنبغي امير بزاف .. ومكيهمنيش هادشي كله .،
- كيفاش حتى عرفتو بعضياتكم .،
- هي قصة طويلة .. الواليد ديالي كان صديق لباباكم .. وكان كيقترح عليه دايما يجي يعطيه دار ويخدمو .. ولكن هو كان قنوع وراضي بحالته .. هادشي اللي خلا بابا يعتبره صديق حقيقي ليه ..خصوصا وانهم عندهم بجوج مشكل مشترك اللي هو انهم بجوج فقدو ولادهم .. ومن تما بدات القصة .. عرفت امير فسن صغيرة وتعلقت بيه.. ومللي بغينا نتزوجو مكانش عند بابا مشكل .. واخا لقينا مشكل مع جدة وماما .. اللي معرفتش علاش لحد الان مكيحملوش امير الا ان بابا عزيز عليه بزاف .. وكيعتبره ولدو .. تزوجنا وولدنا .. وانا مستعدة نعيش معاه فبراكة .. ماشي غا فبلاده ،، حيت امير كان ليا نعم الحبيب ونعم الزوج ..
حسيت بألم عميق فالداخل ديالي .. فرق كبير بين مرت خويا للي تخلات على حياة الرفاهية واختارت الحب .. وبين ياقوت اللي نكرات اي حب بينا .. بمجرد ما لقات حياة مرفهة مع سميرة .. وكرهات اي لحظة عاشتها معايا فالزنقة ..
- عرفتي انا مرتي تخلات عليا لانها لقات واحد اخور لاباس عليه احسن مني ..
- اووو هادي باينة عمرها بغاتك .. حيت اللي كيبغي عمره مايتخلا على حبيبه مقابل اي شيء .. اكيد نتا غاتلقا اللي حسن منها اللي تبغيك وتقدرك .. وتبغيك لشخصك .،
- انشاء الله .. قوليلي .. ذكرتي فقدان للابناء .. واش حتى باباك تلفليه شي ولد ..
- اه بنت .. تخطفات ..
- قلبي معاكم .. انشاء الله تلقاوها ..
- انشاء الله حنا مفقدناش الامل ..
بقينا كنهضرو حتى جا امير ..
امير : علاياش كتهضرو ..
جوهرة: كنهضرو عليك
امير : اها .. وشنو كنتو كتقولو بالسلامة ..
جوهرة : كنت كنقولو شحال كنبغيك ..
امير : حتى انا كنبغيك 😘
كوبل رائع قدامي فرحتليهم ولكن سرعان مكتلاشى الفرحة وكتبدل لحزن مللي كنتفكر ياقوت .. علاش اياقوت علاش ..
تأليف دودي العيساتي وجوهرة مريم
0 Commentaires