الجزء 4
- نتا باينة فيك قلبك طيب بزاف انيس .. انا فرحانة حيت تعرفت عليك..
- وباش عرفتي قلبي طيب ..
- يعني انا غريبة ومكتعرفنيش وعاونتيني ودرتي فيا الثقة ودابا كتعطيني السوارت ديال القصر..
ابتسم وماعطانيش جواب .. هدوءو مريب بزاف .. كيخوفني .. مكايجيش مع هاد الاضاءة الخافتة ..
- تبغي تنعسي ..
- اه مكرهتش الصراحة .. حيت من الصباح وانا واقفة ..
- اجي نوريك بيتك ..
نضنا وتبعتو طلعنا فالدروج .. حتى وصلنا لواحد البيت فغاية الفخامة .. كان زوين بزاف ..
- ليان هادا بيتك .. نتمنى ترتاحي فيه ..
- اكيد .. شكرا بزاف ليك ..
- تصبحي على خير ..
- ونت بخير ..
خوج وخلاني ننعس .. الله على راحة .. مازال كاينين فالدنيا ناس مزيانين .. بقيت كنبقشش فداك البيت حتى فتحت الادراج .. لقيت شي تصاور .. ديال اب وام انيس .. عائلة مثالية .. مفهمتش كيفاش لشي راجل تكون عندو عائلة وقصر بحال هادا ويسمح فيه .. تكتيت على الناموسية ونعست .. الصباح بكري خاصني نمشي ..
دخلات اشعة الشمس وضربات فوجهي .. اصبحنا واصبح الملك لله .. خاصني نوض باش نشد الطريق .. باراكة غير محضرتش المعرض.. غسلت وجهي وخرجت لقيت انيس وامه جالسين عند السفرة .. صباح الخير .. شاف فيا انيس وابتسم ابتسامته الهادئة من جديد وصبح عليا حتى هو .. مشيت جلست معاهم وكنهضر .. وهو ساكتين .. لاحظت باللي كنهضر بزاف ..
- اووبس .. كنهضر بزاف ياك ..
- بالعكس .. انا مستمتع بيك .. هادي شحال مهضر معايا شي حد بهاد الطريقة ..
- انا فرحانة بيك انيس ... كنواعدك غانرجع هنا مرة اخرى..
- هادشي كيفرحني بزاف ..
فطرت وانيس كيشوف فيا .. شوية حط يدو عاى يدي وقال : ليان .. عفاك متخلايش علينا ..
صدمني بديك الهضرة .. شنو كيقصد بيها مكان فيدي الا اني نخرك وجهي بالايجاب .. عاود ابتسم من جديد ..
- انا تعطلت .. انيس ممكن توصلني لعند طوموبيلتي .. وتصاوبها معايا ..
- اكيد .. تفضلي ..
نضت ووجهت كلام لامه : بسلامة امادام شكرا على استضافتكم ..
مجاوباتنيش وانا خرجت مع انيس .. بقينا كنتمشاو ..
- انيس ماماك باينة حالتها صعبة بزاف .. انا حاسة باللي باباك جرحها بزاف ..
- اكتر مكاتخيلي ..
- ونتا صابر معاها ..
- اكيد .. هي اللي عندي فالدنيا ..
تمشينا شوية حتا بدات تبانلي طوموبيلتي ..
- ها هي الطوموبيل .. معرفتش علاش مبغاتش تديماري ..
نقزت فيها وديماريتها وهي تشعل ..
- هاه .. اهيا شعلات .. مالها البارح مبغاتش تشعل ..
شفت فأنيس اللي كانت نظراته عليا ..
- انيس .. كيفاش غانخرج من الغابة..
- سيري مع هاد الطريق وهي اللي غاتخرجك للطريق الكبيرة ..
- شكرا بزاف .. معرفتش كيفاش غانشكرك على كاع هادشي اللي درتي معايا ..
حرك راسو بلا ميهضر ..
- بالسلامة عليك ..
- باي باي .. وتهلا فماماك ..
مشيت .. وبقيت كنفكر .. هادشي اغرب ما وقع لي طول حياتي .. هزيت تلفوني لقيتو بلا ريزو .. اكيد ماما غاتكون مشطونة بزاف .. تمشيت بزاف حتى خرجت من الغابة عاد رتاحيت .. ورجع ريزو لتلفوني .. ولقيت عرام ديال ليزابيل من ماما وختي .. شوية وهو يصوني تلفوني .. خلعني ..
- الو ماما ..
- ليان فينك ابنتي قتلتيني عليك بالخلعة ..
- متخافيش اماما .. انا بخير .. غا البلاصة اللي كنت فيها مكانش فيها ريزو ..
- وصلتي ولا مازال ..
- لا .. راني مازال فالطريق .. ولكن قريب نوصل
- الله يوصلك بخير ابنتي .. Dodi elaissati
0 Commentaires