الحسناء ومدير السجن -الحلقة الاخيرة

الجزء 26 والاخير
ماما ولات لاباس وخرجنا من المستشفى على خير ..قررت اني نعيش من اجل ماما نعيش ليها حيت هي اللي عندي فهاد الدنيا وكنت غنفقدها ..مفكرتش فيها مللي مشيت ولكن مللي بعدت عليا عرفت بقيمتها ومللي مرضات عرفت بقيمتها كتر واكتر ...قررت ننسى كلشي ونعيش لراسي اما كريم واخا حسيتو ندم ولكن الندم ديالو بالنسبة ليا جا معطل لاني تحرقت وشفت الويل ..رجعنا لدارنا واخيرا غنستقرو انا وماما ورجعنا للهدوء ديالي ..الهدوء اللي كنقولو عليه حنا روتين اييه داك الروتين راه نعمة واحنا مكنحسوش بيه ..تعلمت بزاف من هادشي اللي داز عليا ..تعلمت ان الحب ماشي هو كلشي وان اللي كيبغيك غايدير المستحيل على ودك وغايكبر بيك وغايكون كيبغيك دبالصح الى حافظ عليه وجا طلبك من داركم ...هذاك هو الحب الحقيقي ..الحب الحقيقي هو اللي يكون فيه كيخاف عليك ماشي كيستغل حبك وخوفك من فقدانه ...وتعلمت ان البنت اللي تتخلا على شرفها وتفرط فيه تستاهل كل ما داز عليها تستاهل ...حيت فرطات فراسها ..الشرف ماشي هو غشاء البكارة ..الشرف معناه كبير الشرف هو انك تحافظي على راسك وعلى قلبك من اي خدش ..الشرف هو تبغي نفسك وتعتزي بيها وتبعي طريق الله ...تعلمت بزاف دالحوايج ....
دازو الايام وليت كنمشي لخدمتي مع مدام سامية وكندوز الوقت كلو مع ماما حبيبتي وكنتمنى من الله تسمحلي وترجع تفتخر بيا من جديد تألمت بزاف وتعلمت من الالم ...واحد النهار خرجت من الخدمة لقيت كريم كيستنا فيا 
-حسنا ..لاباس عليك 
-الحمد لله ..احسن وقت راني فيه مزيانة حيت عرفت طريقي مزيان 
-لحد امتى غتبقاي هاكا ..مغايجيش شي نهار تسمحيلي فيه 
-كترة البكا كتولد القسوة اكريم ...وانا تعلمت نقسا على كلشي واولهم نتا حيت نهار حتاجيتك فيه لقيت غير القسوة منك 
-حسنا انا مغانقدرش نعيش بلا بيك ..انا جاي اليوم ومصمم انه الا مسمحتيليش ومرجعتيليش غنموت 
جبد شي حاجة من جيبو وتحنى على ركابيه ..علبة فيها خاتم وقالي :
-حسنا تقبلي تتزوجي بيا 
كان الناس غاديين وجايين وكلشي وقف يشوف هاد المنظر الرومانسي اللي انا فيه وشي كيصفق وكيقولي وافقي ..ولكن انا شاعلة فيا النار فقلبي ميمكنش 
-بعد مني اكريم ماباغا لا زواج لا والو بعد مني عطيني بالتيساع ......
كلشي بقا مصدوم فيا مشيت وخليت كريم مورايا مصدوم ..مكانش متوقع اني هازة فقلبي لهاد الدرجة ..مشيت كنبكي ..حرقلي قلبي معرفتش هادشي اللي درتو واش ميان ولا لا واش غندم عليه ولا لا
دوزت نهار خايب بزاف كنفكر فكريم ...واش غندم حيث ضيعتو من يدي ولا يمكن غير كيمثل عليا بحال قبل ..وصل الليل تعشيت ونعست ....
وصلت 3 دالليل سمعت التيليفون كيصوني ...شكون غيتصل فهاد الوقت ..
-الو 
-حسنا..نتي اللي اختاريتي تبعدي عليا ...انا نمووووت بلا بيك نمووووت ..علاش تخليتي عليا

كريم ... واش نتا سكران ؟
-حياتي بلا بيك ضايعة ...بسلامة اللي كانت السباب فتدميري بالسلامة 
-كريم ..الو كريم ..كريم 
قطع عليا .. وايلي غنحماق هادا اش ناوي يدير فراسو ..بمن غانتصل دابا وفين غنمشي بقيت ساعتين وانا كانصونيلو مكايجاوبش غانحماق انا اللي وصلتو لهاد لحالة شوية سمعت التيليفون كيصوني ..هادا كريم 
-الو كريم فينك من قبيلة كنصونيلك 
-الو لالة ..معاك البوليس . مول هاد التيليفون دار كسيدة ومات 
صدمة كانت قوية ..لا لا ميمكنش .. علاش انا مكتوب عليا نتحسر ..انا السبب فموتو انا ...غوتت باعلى صوت .كرييييييييييييييييييييييم ...لا مشيت كنجري للمستشفى غادية وكنطيح (بحال خالتي سيرين هههه) داوني لمستودع الاموات نشوفو ..جبدوه ..حيدت لغطا عليه ..كريم نوض اكريم نوض عفاك متخلينيش انا مسامحاك اكريم نوض ...كريييييم حرام عليك متقتلنيش اكريم انا موافقة نتزوجك ...موافقة ..موافقة ..مواف..كريم
-بنتي فيقي ابني راكي كتحلمي ..بسم الله عليك ابنتي 
-هاه كريم فين هو كريم ...كريم مات اماما مات
-شكون هادا اللي مات ..راه عاد سد معايا التيليفون كان كيسول فيا مسكين ...بسم الله عليك ابنتي كتحلمي 
-كريم ...كريم 
مشيت كنجري نتأكد وصلت لدارو وكنغوت كريم ..كريييم 
خرج عندي مخلوع 
-حسنا مالكي واش شي حد دارليك شي حاجة خلعتيني عليك 
-هادا نتا موقعليك والو حبي كنبغيك موافقة نتزوجو موافقة ...
عنقنو وهو مصدوم معارف مالي 
-متخلينيش اكريم عفاك متخلينيش 
-حبيبة ديالي انا مستحيل نخليك ..اجي مالكي شنو سبب هاد تغيير الرأي المفاجئ 
اهئ اهئ ..حلمتك متتي ..كنت غنموت بالبكا ..منتخيلش راسي بلا بيك انا كنبغيك ومسامحاك على كلشي انا موافقة على زواجنا 
-ومعامن تشاورتي الالة علاه دخول الحمام بحال خروجو 
-نعام 
-ههههه كنبغيك الهبيلة ديالي 
عنقني فالشارع والناس مبهورين شي كيطل من السرجم شي كيطل من الباب هههه معدرهم خلعتهم بغواتي 
وفعلا تزوجنا انا وحبيبي كريم ودارلي عرس اسطوري ماماه فرحات بزاف واخيرا فرحات بولدها والاهم من ذلك انه تزوج اللي كيبغيها ...انا مفاهمة بزاف مع عجوزتي وزدت عزازيت عليها مللي ولدت ليها الحفيد انس ..كيقولو اغلى من الولد ولد الولد ايوا هادي هي وماما حتى هي قنعتها تجي تسكن معانا ..دازت 5 سنين ولدت فيها بنتي الثانية اسراء ومازال حبنا انا وكريم فحال النهار اللول كيعيطلي الاميرة الحسناء ..كنحماق على المشاغب ديالي ..ايوا هادي هي القصة ديالي انا حسناء والعقبة ليكم حتى نتوما البنات بشي واحد بحال كريم الثاني اما الاول مابغيتو لحتى وحدة ...النهاية تأليف dodi elaissati