أكرهه وأحب كرهي له -الحلقة 7

الجزء7
-ادهم
-ويي
-وريني فين كاين هاد الويل قررت نحيت من الدنيا اليوم 
-بردي ولش صحابليك القضية ساهلة ..خدمي عقلك باش متصدقي خاسرة كلشي 
-انا مبقالي عقل ..انا باغا نبرد ناري 
-بردي ..عدوك ماشي ساهل ..ومغتقدريش تتخلصي منو بسهولة ..هو عندو الموت شي حاجة ساهلة ..يقدر ببساطة يتخلص منك ويقتلك قبل متقتليه ..لذلك فكري مزيان قبل متخطي اي خطوة ..
-وكيفاش نقدر ننتاقم 
-خاصك تجعليه يتيق فيك هو الاول حتى يعطيك رقبته بيدو ..ديك الساعة ديري فيه مبغيتي ..عدوك مكيتيقش فالنسا..ولكن نتي بشطارتك خاصك تجعليه يتيق فيك ويبغيك هادا هو الحل الوحيد اللي نقدو نوصلو بيه لهشام ،.وننتاقمو لعماد ..ملقيناش حل من غير هادا لوكان لخاطري نقتلو بيدي ...ولكن هو حاضي راسو مزيان .
-كيفاش غنقدر نشوف فوجهو ونجعلو يبغيني انا لوكان نلقاه منصبرش عليه ونقتلو 
-خاصك تقدري ..على قبل عماد تقدري اريم تقدري 
بعدما عاودلي ادهم عليه كلشي ..قالي باللي كيعمر بزاف فواحد الكازينو ..وقررنا يقدمني ليهم على اساس صديقته وتما خاصني نضرب ضربة ديالي ..على حسب قول ادهم هو كيبغي الحاجة اللي فيد لوخرين ..بقينا شهر كنخططو وكيفهمني كلشي ..وكان كيحذرني من اي خطأ غنرتاكبه حيت الخطأ يساوي حياتي 
النهار الموعود لبست وقاديت راسي مزياااااان ..نفسي اللي من نهار مات عماد متهليت فيها ومشفتش فالمرايا ..عمري نتخيل اني نتزين لشي حد من غير راجلي ..ولكن كمية الكره والحقد اللي فقلبي دابا هي اللي جعلاتني مستعدة ندير اي حاجة باش نوصل للهدف ديالي وباش ننتاقم 
شفت راسي فالمرايا كنت فاتنة بمعنى الكلمة ..خرجت عند ادهم اللي كان كيستنا فيا حل فيا فمو وعينيه وبدا يصفر ..تبارك الله على الزين ..انا عزيتك فيه ومكرهتكش ليا ...ضرت فيه وقلتله جمع راسك والتزم حدودك معايا انا مانا ليك مانا ليه ..ديك الساعة جمع الوقفة ..بنادم ضروري توقفو عند حدو فبحال هاد الحالات باش ميصحابش ليه راك ساهل ..الكره عما ليا عينيا ومبقيت كنشوف حتى واحد قدامي 
وصلنا للكازينو شديت فأدهم فلقطة لاثارة انتباه سيدهم هشام ..دخلنا كل الانظار متجهة ليا ..كل الرجال عيونهم عليا وانا بكل ثقة بالنفس رافعة راسي وماديتها فحتى واحد منهم ..وصلنا للطاولة اللي كان فيها هشام ..
-ادهم :مساء الخير عليكم ..عندي شي بلاصة اليوما هنا ولا والو ..
رفع هشام راسو واتجهات نظراتو مباشرة ليا ..كانت نظرات غير مفهومة هل كانت انبهار او اندهاش او استغراب مفهمتهاش ..طول فيا النظر وانا بكل ثقة بالنفس مبينتش ليه اهتمامي ..فالاخير دار ابتسامة جانبية تعبر عن السخرية وكمل اللعب من جديد ..تماما كما قال ادهم عدوي ماشي ساهل ..وجهه مألوف بالنسبة ليا حاولت نتذكرو اكيد شفتو فشي بلاصة ولكن مقدرتش نتفكر ..تعصبت حيت لوكان تفكرت غنوصل لشي حاجة مهمة ولا شي دليل اخر ولا خيط يعاوني باش ننتاقم منو ..