الجزء 33 والاخير
مللي بدا يكتب العدول طلب مني وليد نقولو شروطي..
- وليد.. انا بغيتك تتهلا فولادك.. وفخواتاتك.. وفميمتك..دير هاد الناس فعينيك.. هادو هما شروطي صافي..
هو استغرب بزاف مللي قالتله هادشي.. كان كينتظر نقولو شي ليست كبيرة ديال الشروط..
كتبنا ووليد كان غايطير فالسما بالفرحة.. حتى انا فرحت لانه من الضروري ولدي يتربى مع باباه ماشي بعيد..
دازت ست سنين .. ولدي دخل للمدرسة.. وانا حاملة فشهري الخامس.. اليوما غادي تتجمع العائلة.. فاطمة الزهراء عندها جوج ولاد .. راجلها ولا طبيب مشهور فالمدينة ديالو .. اما لبنى فهي ربة بيت ممتازة.. عندها 3 دالبنات كيحمقو بالزين .. وراجلها مهلي فيها هو وعائلته.. اما مريم حتى هي عندها جوج دراري وبنت وولات مشهورة فالمدينة بالمحل ديالها وبالطبخ العالمي اللي كيتوجد.. وحلات مدرسة كتعلم فيها الدراري والبنات فنون الطبخ العالمي والمغربي.. نجحات حيت اصرات على النجاح.. خديجة مازال كما ملتزمة بدينها .. اما كمال فرجع عندها مذلول وكيطلب منها السماح.. حيت حجرو على كل املاكه بعدما استثمر دوك الفلوس فمشاريع فاشلة.. منها المضاربة فالبورصة.. اش دا الكامبو لشي بورصة وهو مازال مشبع الماكلة.. خسر كلشي ودوز عامين دالحبس فأوروبا فقضية شيكات بدون رصيد.. خديجة معطاتوش الوقت كاع هي مبقا كيهمها فالدنيا الا رضى الله عليها.. هو رجع للصفر.. وبقا مليوح مذلول حتى واحد مبغا يعاونو.. ابتسام ولات مصممة ازياء مشهورة عالميا.. تشهرات وكبرات بعدما مشات لتركيا وراجلها عاونها بزاف.. تزاد عندهم ولييد سماوه محمد.. ..بالنسبة لسليمة مشات بالعمل الجمعوي بعيد .. حيت ولات من ابرز الفاعلات الحقوقيات فالمغرب.. ولحد الان مازال متزوجات.. يمكن عقدتها مازال متحلات تماما.. الجميل فالامر انها حققات قيمة مضافة فحقوق المرأة.. فرح ولدات بنيتة زوينة.. وراجلها ولا واحد اخور تغير على قبلها.. هي ألفات رواية عن داكشي اللي عاشتو.. وسماتو "السير على الاشواك" .. الرواية تشهرات بزاف.. ودارت ضجة اعلامية قراوها الرجال اكثر من النساء.. حيت كتعطي رسالة للرجال انهم يتبدلو.. ويعيشو الحياة كما يجب ان تعاش.. وانه الحب يمكن له ان يغير الانسان..
كلشي تجمع.. والحاجة فرحانة بزاف حيت محاطة بأحفادها.. على الاقل تخلصات من خوفها على بناتها.. شايفة كل وحدة منهم شادة طريقها.. الطريق الصحيح.. وعارفين اش باغين..
- عمران ولدي.. علاش مكاتاكلش..
- حيت اروى كتلعب مع محمد..
- وفين المشكل.. هادو ولاد عماماتك .. تلعبو كلكم مع بعض.. اروى بنت عمتك لبنى ومحمد ولد عمتك ابتسام.. ماشي غراب..
- لا انا بغيت اروى تبقى معايا غي انا ..
بدا كيبكي وكلنا كنضحكو .. هادا باينة غايخرج بحال باه.. غيبقى يبات حدا باب اروى...
وليد: واش هو لخاطرو.. قلبو للي بغا ..
ابتسام: شكون هادا عمران ولا..
هدى: لا باه .. ههههه
بقا كلشي كيضحك ورجع الشمل تجمع من جديد.. الحياة مهما كانت ومهما دوزات علينا.. قلوبنا لا بد تبقى صافية.. هادي قصة اسرة نموذجية.. قصة كتحكي الظلم اللي كتعاني منو المرا.. وتمنينا انه تتحرر من القيد اللي راها فيه يوما ما.. الظلم اللي كيمارسو عليها الراجل باسم الاعراف والحشومة.. ترى واش غايجي شي نهار اللي نشوفو فيه هاد الحقوق مرسخة فالمجتمع.. نشوفو فيه الراجل يحمي المرأة ماشي كيقهرها وكيلغي شخصيتها؟ هل غايجي شي نهار نشوفو فيه تطبيق فعلي للقوانين اللي كتعطي الحق للمرأة فأنها تاخد حقها ماشي تتدفن؟.تأليف وردة العيساتي..
#النهاااااااااااااااااااية
♥قصة اخو البنات♥
بقلم← Dodi El Aissati
0 Commentaires