الجزء 32
بقيت كنفكر .. شوية سمعت الدقان فالباب..
- فرح سيري تنعسي قلتلك ماباغاش ناكل..
- انا وليد ..
قفزت من بلاصتي .. وليد .. واش جا يكمل لداكشي للي بداه.. جاني الخوف.. شنو غيدير.. ترددت بزاف حتى حليت الباب.. لقيتو جابلي الصينية فيها العشا.. واه اخر حاجة كنت كنتوقعها منو .. انه يتنازل ويجيبلي نتعشا..
- دخل..
- انا جبتليك تاكلي .. ماكليتي والو النهار كامل..
- شكرا..
حطلي وبدا كيوكلني ..
- هادي باش نتأكد باللي غاتاكلي بالصح ماشي غا كتقوليلي شكرا تأليف دودي العيساتي
ضحكت.. وبدا يهضر عاود..
- هدى.. سمحيلي مقصدتش نضربك.. انا كيضرني قلبي مللي كنفكر باللي مديت يدي عليك.. انا ماشي من حقي نمسك.. هاديك حياتك ونتي حرة شكون انا باش نتدخل فيها..
مللي سمعتو قال هاد العضرة بلا منحس بديت كنبكي وكنشهق بلا الدراري الصغار ..
- اهئ اهئ وليد انا .. انا .. اهئ اهئ مكنتش باغا نركب معاه .. كان الليل ووصلنا انا وواحد الطبيبة باحترام .. وبقيت انا التالية ..اهئ اهئ والله مبيني وبينو شي حاجة والله .. والله ..
- كان عليك تصوني عليا.. ونجي نوصلك واخا كانت 4 دالليل.. راه هاداك غريب .. وشفتو كان باغي يسلم عليك من وجهك .. استفرد بيك
- اهئ اهئ راني مبغيتلوش ووقفتو عند حدو اهئ اهئ والله منعاود نركب معاه والله
قرب عندي وعنقني : صافي عفاك باراكة من البكا.. دموعك كيضروني فقلبي .. منقدرش نشوفك كتبكي وانا السبب.. عنقتو حتى انا .. وسكت من البكا .. حسيت واحد الراحة والامان فحضنو .. مكنتش باغا نطلق منو كاع ..
سمعت واحد الصوت اللي مدرناش بحسابه بجوج بينا ..
- وليد اش كادير هنا بوحدك.. واش هاد الحالة.. نتا دابا والليتي خاطب وفحكم راجل مزوج.. واش محشمتيش اهدى.. حنا درناك بحال بنتنا وعيشناك وسطنا .. ونتي كادوري براجل مزوج.. ماشي حشومة عليك ..
وليد: الواليدة باراكة .. هدى معندها حتى ذنب .. اجي نهضرو بوحدنا..
مشاو وانا قلبي مقبوط.. مشيت تبعتهم وتصنت عليه .. كنسمعو متقوله مغتباتش فهاد الدار .. صوني لعمها يجي ياخدها..
خفت لتفرقني على وليد.. مشيت وسديت الباب عليا وانا خايفة.. من القادم
الجزء 33
بعد داكشي اللي وقع الحاجة مبقاتش حاملاني ومبقاتش كتدوي معايا... مشيت الغد ليه للخدمة مللي كملت.. مشيت لعند وليد للمحل ديالو.. مللي شافني فرح بزاف..
- هدى.. نهار كبير هادا.. اجي جلسي ..
- وليد..انا جيت نهضرو هنا.. مبغيتش نبقاو نهضرو فالدار.. ومبقيتش باغا تشوفنا الحاجة مرا.. راه ولات حاضياني بعد داكشي ديال البارح..
- واخا .. الى غتبقاي تجي عندي هنا معندي مانع 😉
- وليد.. بغيت نطلب منك واحد الحاجة..
- آمري .. اللي طلبتها غتحضر ودابا ..
- بغيت ترجع الاستاذة تقري البنات فالدار.. وبغيت نشري كمان اخور لابتسام بدل هاداك الي هرستيلها..
- بالنسبة للاستاذة .. انا معنديش مانع .. تجي تقريهم .. انا من الاول كنت عارف باللي كتجي .. وكنت فرحان ومبغيتش نتدخل ودرت راسي معارفش .. ومللي طردتها كنت مجروح منك .. مجروح بزاف .. مكنتش كنحس اش كنت كندير.. كنت باغي غير نردلك الصرف بأي طريقة.. وطردتها.. وحتى الكمان ديال ابتسام.. انا غانشريه وعطيه ليها كأنك نتي اللي شريتيه... هاكا غنكون صلحت شوية من الاخطاء اللي درت وانا مجروح ..
- والزواج ديال خديجة غتقدر تصلحو؟
تبدل فيه اللون وناض من قدامي!! بقيت كنشوف فيه .. جا جلس عاود تاني ..
- معرفتش .. اذا كنت ظلمتها.. يمكن صلحت حياتها ماشي ظلمتها ..
- كيفاش صلحتي حياتها وانت زوجتيها بشارف..
- خديجة ضيعات راسها .. وهادا هو الحل الوحيد اللي كان قدامي .. هادوك خواتاتي وانا عاهدت نفسي نحميهم ونسترهم حتى نموت..
انا تصدمت بهضرتو ووليت حمرا: وليد .. اش هاد الهضرا ..
- انا غانكون معاك صريح .. انا النهار اللي خرجتي نتي وخديجة وكدبتي عليا .. كنت عارف باللي مشات تتلاقا مع كمال .. غير من خلال ارتباكك وانا كنسولك عليها.. وبقيت تراقبكم من بعيد شفتها مللي جات وكان كيستناها هو من البعيد.. مكانش صحابلي ضيعات شرفها معاه داك النهار.. وحافضت على هدوءي وفكرت بهدوء خفت من التسرع ..حتى النهار اللي ديتيها للسبيطار .. قلتيلنا راه عندها تسمم.. سولت واحد الفرملية فالسبيطار بعدما ضورت معاها.. جابتلي الخبار كاملة.. قلبي كان غيسكت .. مقدرتش نهضر.. حيت نتي كنتي فالموضوع ومقدرتش نحملك المسؤولية. بقيت كنفكر كيفاش نسترها.. الحاج نعمان كان من زمان كيصدعني بغا يتزوج من عندنا ولكن مكنتش كنبغي.. فكرت فيه اصلا هو معروف وخبارو واصلة باللي شرف وعيا ومقاد على زواج ومشيت عندو قلتله انا موافق على طلبك.. وبقيت كنشكرلو فخديجة.. حتى حسيتو ملهوف عليها .. والباقي نتي عارفاه..
انا مبقيتش قدرت نهضر بقيت حالا فمي فهادشي ..
- يعني نتا درتي خير فخديجة بهادشي..
- هي فوقاشما بغات تطلق منو انا غانكون بجنبها .. انا خوها وغانحميها.. القسوة اللي كنبين ماشي كتعني الكره.. ولكن كل واحد وطريقته..
- وليد.. خواتاتك محتاجين الحب ديالك والعطف ديالك .. ماشي غا حمايتك.. عفاك تقرب منهم.. حسسهم بحبك.. وانا اكيدة عمرهم ماغايفكرو يديرو شي حاجة خايبة.. غيفكرو فيك وغيديرو بحسابك ماشي خوف منك.. وانما قيمة ليك .. واحترام ليك ..
- غنحاول ..
0 Commentaires