أكرهه وأحب كرهي له -الحلقة 12

الجزء12
مشيت معاه للدار ..كانت دار كبيرة وزوينة بزاف يغلب عليها الطابع الاوروبي في التصميم ..كلشي بسيط وراقي ..واش نتا عايش بوحدك هنا ..فين عائلتك ؟
-انا معندي عائلة ..صحابي هما عائلتي ..وحتا نتي دابا وليتي عائلتي ..شد لي فيدي وباسها ..غتكوني حياتي كلها وتعوضيني على الحرمان اللي شفتو فحياتي ونولدو بنت تشبه فيك...نطرت يدي بسرعة مللي سمعت بنت ..تفكرت بنتي ..
-مالكي ..واش قلت شي حاجة اللي قلقاتك ..سمحيلي 
-مكاين والو ..مكرهتش ننعس 
-اه طبعا ..اجي نوريك بيتك 
دخلني لواحد البيت ..مربت مزيان وزوين واسع ..قلتله مجبتش معايا حوايج النعاس ممكن تعطيني شي حاجة من عندك ..مشا جابلي شي تيشرتات دبالو قالي خطاري فيهم ..كلشي جاوني كبار بزاف كنبان فيهم بحال النملة ..مللي خرجت عندو بوحدة منهم بقا كيضحك عليا بجهد تغوبشت وهو يحبس الضحكة ولكن باينة حالتي كانت كتضحك بزاف ..قلتله صافي هانا نديباني بهادي وصاف تصبح على خير ..دخلت وسديت الباب ..درت راسي ناعسة بقيت شي ساعة مكنسمع لا حس لا والو ..باينة يكون ناعس حتى هو قلت هادي فرصة نستكشف دارو خرجت بالحفا وتمشيت دارو واسعة ..شوية سمعت شي صوت خافت ..تبعت الصوت منين جا دخلني الشك واش كاين شي حد اخور فالدار ..تمشيت بزاف والصوت كيزيد يكبر ..مللي وصلت للغرفة اللي جاي منها الصوت..فتحت الباب بشوية ..حتى بانلي هشام رافع يديه وجالس على سجادة وكيبكي وكيدعو الله يعطيه القوة ويرحمه ..منظر اكثر من غريب ...قاتل ومافيا وكيصلي ؟؟ واش اللي بحال هادا كيعرف الله ...بقيت كنشوف فيه ..منظره زوين وهو عابد لله ..سديت الباب باش ميحسش بيا ومشيت رجعت لبيتي ..ونعست 
الصباح فقت معطلة ..لقيت راسي كيما نعست يعني هشام ماجاش عندي ..عجبني احترامه ليا وانه مستغلش وجودي فدارو باش يتقرب مني ..عجبني تعامله معايا كذات ماشي كوسيلة ..خرجت عيطت عليه مكاينش فالدار نزلت لقيت الطبلة مقادة فيها فطور وورد احمر وورقة مكتوب فيها صباح النور على اجمل ملاك فالدنيا ..فطورك جاهز ..اضطريت نمشي حيت عندي شي خدمة مهمة ..بقاي معايا اليوما فالدار مكرهتش نجي من الخدمة ونلقا مولات الدار كتستناني ..بدون شعور درت ابتسامة لا ارادية واتجهت للفطور نفطر ..كان لديد بزاف كليت ..ونضت استكشفت الدار كلها كانت فرصة بالنسبة ليا ..الدار كانت عادية جدا وحتى حوايجو مكيخليش شي حاجة مهمة هنا ..اش هاد الغباء فيا كيفاش بغيتو يخلي هنا حاجة مهمة وانا فالدار بوحدي بزاف على الحب والثقة ..
بقيت جالسة كنستنى فيه حتى جاني الملل وقلت علاش منوضش نوجد الغدا ..بقيت فالكوزينة كنتفنن وكنقاد فين ما كانت شي حاجة وجدتها ..باش نعمر الفراغ ..سمعت هشام جا كيعيط شفت فيه وابتسمت قلتله مرحبا بيك ..وقلتله جوج دقايق تلقا الغدا على الطابلة ..فرح بزاف وقالي هادا مكنت كنتمنى ..طلع يدوش ويبدل حوايجو وانا استغليتها فرصة باش نحط الغدا على خاطري ..زوقت الطابلة وحطيت كلشي مللي جا ..
-امممم باينة هادشي لديد كيشهي ..بدا يدوق من كل حاجة وكاياكل وحتا انا جلست وكناكل مرة مرة كيدوقني ...مللي شبعنا نضت نجمع قالي لا مرتي الحبيبة عيات اليوما انا اللي نجمع كلشي نتي غا رتاحي ..ديك مرتي بقاتلي فبالي واثرات فيا كان كيقولهالي عماد ..مبينتلوش ملي كمل جا عندي بقا كيعاودلي على نهارو وباللي فرح وحس بالسعادة اليوما وباللي اول مرة كياكل من قلبو..من جهة بقا فيا صعيبة الوحدة بزاف انا مجرباها صعيب تحس باللي معندك لمن تعيش وعلاش تعيش ..من نهار ماتو بنتي وراجلي وانا حاسة نفس الاحساس ..