الدية -الحلقة الخامسة والثلاثون

الدية - الحلقة الخامسة والثلاثون 
تأليف دودي العيساتي 
الشاب : تفكرتي شي حاجة .. 
الراجل : ابدا .. كنحس راسي معدوم فهاد الدنيا .. معندي ماضي ولا حاضر ..حتى اسمي مكنعرفوش .. شحال من سنة دابا وانا راني هنا .. وانا ماعارف حتى حاجة .. 
الشاب : غاتفكر .. متخافش .. اكيد غايجي النهار اللي غاتفكر فيه كلشي .. 
وصلت عالية لدار الريان اخيرا .. نزلات من الطوموبيل هاد المرة بسرعة .. بدون تردد دخلات وبدات كتغوت .. 
عالية : عيشة .. عيشة .. بنتي 
عالية الابنة : ايه ايه ايه .. واش راكي فكوري ولا .. راكي فدار الالة .. شكون نتي واشنو باغا .. 
عالية : بنتي عالية فين اهيا .. 
سامية : اش جاية تديري هنا تاني اعالية .. ياك قلنالك داك النهار بنتك مراهاش عندنا .. 
عالية : نتي كدابة .. ولدك خطف ليا بنتي .. انا غادي ندخله الحبس ..
سامية : سيري جيبي البوليس .. واش جاية تلوحي علينا الباطل فدارنا .. سيري بحالك .. 
اكرم : مراد خطف عيشة .. الاختطاف راها جريمة .. غاتزادليه على جريمة الاغتصاب وحنا مغاديش نسمحو فحق عيشة .. 
سامية : خرجو من داري .، قلتلكم مكايناش هنا..
اكرم : ها حنا غانشوفو .. مللي غانجيبو البوليس
سامية : سير جيب شكون ما بغيتي.. 
عالية : عيشة .. عيشة .. بنتي فينك .. 
فبيت مراد كانت عيشة جالسة على الناموسية وحاطة يدها على خدها .. اما مراد كان ناعس .. شوية وهي تسمع صوت امها .. ناضت 
عيشة : ماما .. هادي ماما 
فاق مراد وناض بسرعة شدها .، 
مراد : ششش .. سكتي واياك تسمعيهم صوتك .. والا نتي عارفة اش غايوقع .. 
عيشة : عفاك 😢 
مراد : اوووف واش مكتفهميش متعصبينيش 😠
عيشة : ياك نتا واعدتيني مغاتوليش تغوت عليا 😭.. ها نتا كتغوت .. 
مراد : اففف .. صافي هانا كنهضر بشوية .. فهميني .. الى مشيتي معاهم غاناخد ولدنا منك وغاتبقاي بعيدة عليه .. واش بغيتي هادشي يوقع
عيشة : 😢 لا ..
مراد : مزيان .. اذا سكتي .. عرفتي شنو.. حنا غانمشيو من هنا كاع .. 
بالعودة الى عالية ..
عالية : بنتي اسامية .. هاد المرة غانطيح على قبلها روح .. سمعتي .. الا بنتي .. 
سامية: برا .. عطينا بالتيساع .. 
عالية : نتوما اللي عطيوني بالتيساع واش مكفاكمش داكشي اللي درتو فيا .. 
اكرم : زيدي اماما .. حنا غاناخدو حقنا .. 
خرجو اكرم وعالية من الدار.. مشاو يركبو فالطوموبيل حتا سمعو صوت .. 
لينا :عفاكم ستناو .. 
اكرم : نعام الالة .. 
لينا : انا لينا الريان .. 
عالية: اشنو بغيتي .. 
لينا : بغيت نقوليكم باللي انا اللي هربت عيشة النهار اللول .. 
اكرم : فيناهيا دابا .. 
لينا : معرفتش .. ولكن كونو اكيدين اني غانعلمكم الى عرفت .. 
عالية : غريب .. اول مرة نشوف وحدة من سلالة الريان انسانة ..
لينا : لالة .. كل واحد كيتحمل مسؤوليته .. 
اكرم : ممكن ناخد رقمك .. 
لينا : طبعا .. 
تبادلو الارقام .. 
لينا : انشاء الله تلقاو عيشة .. 
اكرم : كنشكرك بزاف .. 
تأليف دودي العيساتي ..