الدية -الحلقة التاسعة والعشرون

الدية- الحلقة التاسعة والعشرون ..
تأليف دودي العيساتي .. 
عيشة : خالتي .. متعاوديش تتخلاي عليا .. 
صالحة : متخافيش ابنتي .. متخافيش .. شوفي انا جبت معايا الضياف 
عيشة: مرحبا .. عمتي غاتفرح بزاف مللي تشوفكم .. تفضلو .. 
صالحة : الله يرضي عليك ابنتي .. 
دخلو كلشي وعالية كترجف ومقاداش تحيد عينيها من عيشة ومكرهاتش تعنقها وتبكي فحضانها .. دخلو وجلسو .. 
عيشة : انا غانوجد اتاي ونعيط لعمتي ... 
مشات عيشة عيطات لعمتها اللي ناضت بسرعة تشوف ضيافها .. 
العمة: الصالحة .. مرحبا بيك .. نهار كبير هادا .. الولاد وخويا لاباس عليهم .. 
الصالحة : لاباس اختي .. شوفي شكون جبت معايا .. واش عرفتيهم شكون .. 
العمة : ممتيقاش عينيا .. 😳 عالية !!
عالية : لاباس عليك .. عقلتي عليا .. 
العمة : شكون يقدر ينساك .. وشكون يقدر ينسى الظلم اللي تعرضتي ليه.. ياااااه يا الدنيا .. بعد كل هاد السينين .. رجعتي .. باش تشوفي نفس السيناريو كيدوز على بنتك.. 
عالية : 😢 رجعت نقلب على بنتي اللي تخليت عليها .. عيشة .. 
العمة : عيشة.. كيفاش غانقدرو نقولولها باللي امها مازال عايشة وماماتتش كيف كتعاقد هي ..
فجأة تسمع صوت شي حاجة طاحت فالارض .. ناضو يشوفو لقاو عيشة واقفة فالباب ومصدومة والصينية طايحة من بين يديها .. تأليف دودي 
عند عيشة .. مشيت نصاوب اتاي بعدما خبرت عمتي .. وانا فرحانة اني شفت خالتي .. اللي رباتني .. صاوبت كلشي دغيا .. وديت الصينية واستوقفاتني هضرة عمتي اللي شوكاتني .. طاحت الصينية من بين يدي وانا مصدومة كنسمع هضرة عمري تخيلت نسمعها .. انا امي مازال عايشة ،. واش كنحلم .. مقدرتش نتحرك بعد ديك الهضرة وخصوصا بعدما ناضو كلهم عندي .. اول واحد جات عيني فيه هي خالتي .. 
عيشة : خالتي .. 
اكرم : عيشة سمعينا .. كاين بزاف دالحوايج خاصك تعرفيهم .. 
عالية : بنتي 😢 اجي عندي .. 
عيشة : بعدو مني .. بعدو مني كلكم .. 
مشيت كنجري دخلت لبيت خديجة .. وسديتو .. وبقيت كنبكي .. شفت فخديجة اللي عينيها كانو طايبين بالبكا .. مشيت عندها عنقتها وبقينا كنبكيو بالجهد بجوج بينا بحال شي بنيتات صغار .. بكانا كان يعبر بدون كلمات على مدى المنا بجوج .. وعلى تعبنا فالدنيا .. اللي تقهرنا وحنا هازين حمل ماشي ديالنا .. وماشي ديال العمر ديالنا .. اللي المفروض نكونو عايشين اجمل سنوات حياتنا .. بالمقابل حنا عايشين كوابيس .. مقادرينش نفيقو منها ..
عالية : بنتي 😭 انا كنت عارفة انها مغاتقبلنيش .. ومغاتسامحنيش .. 
اكرم : تهدني امي عفاك .. الصدمة كانت قوية عليها ولكنها غادي تتأقلم معاها وغادي تولفها .. واكيد غاتفهم .. هادي راه حالة عادية .. 
العمة : عيشة حساسة بزاف .. ورقيقة .. ولكن فنفس الوقت قوية .. اكيد غادي تفهم وتعذرك ولكن خاصها وقت .. 
اكرم : عندك الحق .. وحنا مغانفقدوش الامل .. 
العمة : كنصحكم تخليوها دابا .. وانا غادي نحاول نفهمها كلشي .. 
عالية : عفاك حاولي تفهميها اني تعدبت ومعشتش مرتاحة بلا بيها ..
العمة : متخافيش انا غانقوم بالواجب .. 
عالية : فهميها ان عندها عائلة تحميها من تجبر الريان.. واني غادي نحميها هي وولدها بجوج .. 
العمة : هادا هو المهم .. حيت عقدة حياتها وخوفها غير منهم .. 
عالية : انا مستعدة نفديها بحياتي .. 
العمة : يكون خير.. 
توادعو ومشاو .. واتجهات العمة للبيت .. 
العمة : عيشة بنتي .. فتحي الباب .. مكاين حد كلشي مشاو .. 
نضت فتحت الباب لعمتي وعينيا كلهم دموع .. شفت عمتي وعنقتها .. 
عيشة : عفاك قولي اني غا كنحلم .. وهادشي ماشي صحيح .. 
العمة : اش هادشي كتقوليه الهبيلة .. نتي خاصك تفرحي حيت عندك اسرة .. 
عيشة : نفرح !! نفرح حيت عرفت ان ماما عايشة وعاشت حياتها وخلاتني يتيمة .. نفرح حيت اني عشت حياتي كنرضى باي حاجة غير حيت انا يتيمة ومعندي اللي يخاف عليا .. نفرح حيت خالتي ضحات بيا غير حيت معندي حتى واحد فالدنيا .. نفرح حيت خسرات ديك الصورة الزوينة لماما فعينيا .. علاياش نفرح بالضبط .. 
العمة : حيت عندك اسرة واللي غاتحميك من مراد وعائلته .. هادا سبب يخليك تنشطي ماشي غير تفرحي .. 
عيشة : حتى واحد ميقدر يعتقني من مراد .. حيت اللي بيني وبين مراد مبقاتش علاقة دية بجلادها .. العقدة تطورات بزاف .. حتى واحد ميقد يحلها تأليف دودي العيساتي